Lunglei Municipal Council vice chairman Pu K. Lalrinawma chuan, “Ram hruaitu lu atangin sawrkar hnathawk ei ru theite eiru vek tura kan ngaihna ram ni thin kha, Pathianin tunah chuan India ram state-a eiruk tlemna ber zingah min hruai thleng ta; kan politician, minister leh MLA te pawh eiru tia sawi tur kan nei ta lo pawh hi Pathian hnenah lawmthu sawi mai tur kan ni…” tiin tun hnai khan a sawi a.
He thusawi hi mi â nileng lo tan chuan, sawrkar hmasa leh tuna sawrkar mek dinhmun khaikhinna a ni ang tih a rin theih mai a. Sawrkar hmasa hun laia politician, minister leh MLA te kha chu ‘an eiru’ tia sawi thin niawm takin … “eiru tia sawi tur kan nei ta lo..” tiin a sawi a. Hei hian a entir theih ni ta chu, “Congress emaw, MNF emaw sawrkar hnuaia politician, minister leh MLA te kha chuan an eiru a, ZPM sawrkar hnuaiah chuan eiru an awm ve ta lo…” tihnaah a ngaih theih a ni.
Mizoram state hi India ram state zinga eiru lo ber pahnihna a ni tih sawi chhuak hmasatu hi chief minister Pu Lalduhoma a nih a rinawm a. Report hlui atanga kan hmuh phak chinah, India Today NE chuan Nov 05, 2025 khan CM thusawi hi a tarlang a. “Lalduhoma says Mizoram ranks second least corrupt in India….” tiin. Hei hi Mara Students’ Organisation diamond jubilee lawmnaah a sawi a. A source hi CMS – India Corruption Study report niin tarlan a ni bawk. October 26, 2025 khan Times of India chuan, “Quoting a CMS-India Corruption Study, CM Lalduhoma on Sunday said Mizoram was placed second among all the other states in terms of less corruption, next only to Lakshadweep…” tiin a dah bawk a. CMS-ICS (Centre for Media Studies – India Corruption Study) hian kum 2018 thleng chauh report a siam niin a lang a. Internet lamah chuan CMS-ICS 2018 (2005 to 2018: How well are states placed?) thleng chauh hmuh tur a awm a. Chu lah chu state 13 thlurbingna niin NE state te hming a lang ve lo. Combined State tihah erawh an awm mahna le; mahse, NE state te hminghmerha tarlanna hmuh tur a awm mai lo. Report tharlam berah a awm a ni ange han tih dawn lahin, 2018 hnu lamah CMS-ICS report hmuh tur a awm bawk si lo.
Eng pawh ni se, chief minister meuh chuan layman te ai chuan source a nei thain a nei ril zawk ang tih a rin theih mai a, chu lam chu kan sawi tum ber a ni lo.
CMS-ICS 2018 report-ah hian eirukna criteria hi a pawnlang angreng hle a; (pawnlang tih hian eirukna ngaihnep lam a kawk lo) a thupuiah pawh “Paying Bribe in Public Services” tih a ni a, Minister, MLA leh Officer etc. te inkara puanhnuai thil, contract, tender, restricted tender, etc. etc. tih lam a ni lo. Department 10 hnuaia public services a that leh that loh tehna a ni deuh mai a, entirna pakhat chauh tarlang ila: Avoid Challan for Violation of traffic rule (34%) tih te a ni a, hetiang practice hi za zela 34 a thleng, tihna a ni mai awm e.
A pawnlang deuh china ngaih theih tuna Mizorama kan practice nasat em em heng—garage nei lo chunga dan kalha lirthei register te, Aikal lak te, dik lo taka pension lak etc. etc. ang hi CMS-ICS 2018 tehkhawngah telh ni ve ta se, eiruk tlemnaah hian engzatna tak ni ta ang maw, Mizoram hi!
Eirukna a tlem/a tam tih te hi kan sawi thei a nih chuan action lak mai awm tak a ni a, a thu chauh hi kan tuipui a nih hmel!
“Eiru tlemna ber zingah Mizoram…”
