Chief minister Lalduhoma chuan Mizoram chu India ramah Lakshadweep dawta eiruk tlem berna a ni tih a sawi. October 27 atanga November 2 chhung hian Vigilance Week 2025 hman a ni dawn a. Hemi denchhena chief minister-in thuchah a siamah, eirukna laka fihlim theihna turin sawrkar laipuiin Prevention of Corruption Act 1988 a siam a; sawrkar hnathawkte chu CSS Conduct Rules 1964 danin a phuar tih a sawi. Prevention of Corruption Act 1988 hnuaiah Anti Corruption Bureau (ACB) leh Mizoram Lokayukta din a ni tawh, tiin, kumin chhungin eirukna leh a kaihhnawih thilah ACB chu preliminary inquiry tih phalna 10 pek a ni tawh a, regular case siam phalna 5 pek an ni tawh tih a sawi.
Transparency International-in eiruk hluar lam tehna – Corruption Perception Index 2024-ah India chu ram 180 zingah 96-naah a dah a, kum 2023 aiin kum 2023 hian pathumin a ziaawm zawngin a lawn chho tih a sawi. Transparency International leh NITI Aayog data behchhana CMS India Corruption Study-in a zirchiannaah, Mizoram chu India ram state leh union territory-ah Lakshadweep dawta eirukna tlem berna a ni, tiin, hei hi thil chhinchhiah tlak leh chhuanawm tak a ni thu a sawi a ni.
“Vigilance Week hi kumtin Sardar Vallabhbhai Patel piancham, October 31 huamchhunga hman thin a ni a. Hruikhat vuana eiruk leh hlemhlet do tura mipui zirtirna atana hman thin a ni. Mizoram sawrkar Vigilance department pawhin kum 2018 atangin kumtin he hapta hi a hmang thin,” chief minister hian a ti a. Eirukna chu hmasawnna daltu, mipuiin an chanvo dik an chan theihlohna bul, Pathian huat zawng a ni, tiin, mahni chhungkua theuhah eiruk do hna huai taka kalpui tur leh eiruk sum atanga lei thil reng reng duh lo ngam turin mipui a ngen tih a sawi a ni.
Eiruk a tlemna state kan ni: – Chief minister
