Court-in sum tih chingpen thubuaia thiam loh a lo chantir tawh Lai Autonomous District Council-a MNF Legislature Party leader V Zirsanga chuan leader atanga banna a thehlut a, MNF Legislature Party leh MNF District Hqrs Lawngtlai office bearer thukhawm chuan an hnawl sak.
LADC executive member, MNF Legislature Party deputy leader C Rongura chuan an leader V Zirsanga hian 2024 February 9 khan leader atanga banna a thehlut tih sawiin, February 11 khan MNF Legislature Party leh MNF District Hqrs OB ten a banna hi an ngaihtuah a ni. LADC Constitution, Conduct of Business Rules 2010 en chungin, V Zirsanga dinhmunah Legislature Party leader a chelh theihlohna an hmuh loh avangin leader atanga banna a thehluh hi an hnawl tih a sawi.
Lai ADC-a chief executive member, LADC-a MNF Legislature Party leader V Zirsanga hi LADC sum tih chingpen thubuaiah Special Court Prevention of Corruption Act chuan thiamloh chantirin a hrem a, jail-a khung nghal turin a ti. Court thuremnaah lungawiloin V Zirsanga hi High Court-ah a zualko a, High Court chuan thuremna lo awm tawh chu kalpui rih loh tur, tiin, V Zirsanga pawh kumin January 31 khan bail-a chhuah lailawk a ni tih thu dawn a ni.
Eiruk thubuaia thiam loh chang Leader atanga a banna pawm lo
