Eirukna a awm loh chuan mamawh thil tihnaa sum dah chu daihzai takin a hman theih tih chief minister Lalduhoma chuan a sawi. Power & Electricity department hnuaiah transformer thar lei tum a nih thu a sawinaah chief minister chuan, “A hmalama transformer thar lei thin ho kha a hlui te a lo ni a, chutah middleman kaltlanga to tak taka lei a lo ni thin a, tunah chuan pawisa tlem zawkin transformer tam zawk kan lei thei tawh dawn,” a ti. Budget-ah transformer thar lei nan cheng vaibelchhe 20 dah a ni tih a sawi.
“Eirukna a awm loh chuan sawrkar sum hi a lo daihzai hle,” a ti.
Kawng laih leh lei dawhah contractor-te hna a chhia a, sawrkar hmasa hnuaia contract an pek, zawh mumal loh leh hna chhe si, pawisa la tawh si an chhawm chuan an lu a tihai hle tih chief minister hian a sawi.
Kawng chhia leh lei dawh muang avang hian Kolasib district Meidum chhehvela oil leh gas zawn kawngah pawh hna a chawl thup a, hei hi an ui avangin tharthawh turin ministry lamah an thlen tih a sawi. Oil leh natural gas zawngtute pawhin lei dawh ngai dawh zo thei lo chu an manganpui thu an rawn thlen tawh tih a sawi bawk.
Heng lai hmuna hna thawktu, contractor chu Kamrul-a a ni tih Lalduhoma hian a sawi a. A ni hi sum a nei loa, a khawngaihthlak hle tih PWD hotuten an hrilh thu a sawi. A hmaa hna tam tak nei anga lang leh a bill tang ve ngai lo anga sawi thinah khan a chan a tlem thin nia a lan thu a sawi a ni.
“PWD hotute nen kan thukhawm a, hna thawk zel turin tih ngaihna awm tawh loah ngaiin a contract hi terminate mai tul kan ti a, hna thawk tur thar zawnnaah restricted tender pawhin dan ang thlapa tih ngam a ni, kan ti a. Hemi tih zawh chuan oil leh natural gas zawn hna hi kan thawk zawm thuai thei dawnin kan hria,” a ti.
Eirukna a awm loh chuan sawrkar sum hi a daihzai – Chief minister
