Site icon The Aizawl Post

Eitur funna

FSSAI Advisory Dt. 12th June, 2026 chuan eitur funna bawm chilh nana stapler emaw thir lam chi reng reng hman a khap a. Hemi chungchang hi Mizoram sawrkar hnuaia hriselna lama mawhphurtu Health & Family Welfare department pawhin mipui hriat turin a tichhuak tawh a; district tin-ah DC office-in mipui hriattirna ‘circular’ an tichhuak leh mek bawk a. Circular ang chuan, eitur funnaah label dah vek tur tih te, eitur hming, siam ni leh expiry date te, bakery product bikah eitur chawhpawlh hmingte tarlan tur tih a ni.
Hriattirna/khapna order tihchhuah mai hi chu kan harsat lo a, mipui hriattur pawimawh leh mipuiin an zawm tur ‘khapna dan’ chi hrang hrang hi a chhuak mawlh mawlh reng mai tih tur a ni.
Hetih rual hian, heng ‘zawm tur’ dan leh thupek tihchhuah a nih hian, a stakeholders lam hian an zawm tha em tih leh, awlsam zawka mipuiin harsatna an thlen dan tur te hi ruahman zui a ni em tih te pawh zawhna pawimawh tak a ni awm e.
Tuna hriattirna tihchhuah mek hi, FSSAI chuan kumin June thla khan a tichhuak daih tawh a, a hnu lawkah health department-in a tichhuak ve leh a, district hrang hranga thuneituten an bawhzui zel bawk a. Tichuan heng zawhnate hi chhan tur a awm ta a ni: Khapna danin zawm a hlawh em? Zawm hlawh lo se eng tin nge thuneituten hma an lak zui? Dan bawhchhia hrem an awm tawh em? An awm chuan eng penalty nge hman a nih? Mipuiin sawiselna an nei em? Mipui zualkona tur siam a ni em? Zawhna dang tam tak pawh a la awm thei ang.
Eitur funna chilh nan stappler hman khap a nih thu hi a hre tur ten an hre tawk lo nge, hre chungin dan an palzut zawk tih turin, tun dinhmunah hi chuan ‘stappler’ hmangtu hi an la tam hle a. Thil dangah pawh dan bawhchhiatna chu a la awm zui zelin a rinawm.
Eng pawh ni se, a mawhphurtu department lam hian ‘thawktu kan indaih lo’ tih chhuanlam an siam dawn nge hriat a ni lo a, tun laia IT lama thiamna leh hmasawnna hi tunah chuan duhtawkin a hman tangkai theih tawh tih kan hre tlang awm e.
Food Safety and Standards Act, 2006 hnuaiah hian pin/wire lam chi eitur funna chilh nana hmangte hremna (Penalty) chu Rs 2,00,000 thleng chawitir theih a ni a. Eitur leituin pin/wire lam chi a lo ei tel a, hliam a tawrh chuan cheng nuai thum chawi leh kum khat chhung jail tan theihna a ni a. Hliam a tawrh loh pawhin eitur zinga pin/wire lo awm a ei palh hrim hrim ringawt pawh khan cheng nuaikhat leh thlaruk jail tantira hrem theih a ni hrim hrim a ni. Hliam na tak a tuar phei chuan kum ruk jail tan leh cheng nuai nga thleng chawi theih a ni a; a lo thih phah phei chuan dam chhung lung in tan bakah cheng nuai 10 aia tlem lo chawi theihna a ni bawk.
Hetianga dan pawimawh, mipui himna atana pawimawh ang hi chu, a zau thei ang bera mipuiin an hriat theih tura vawrh darh hi a pawimawh hle tih a lang reng mai. Khapna Dan hian zawm a hlawh leh hlawh loh hriatzui kawngah sawrkar thuneituten tan lakna tur an la ngah hle tih a lang bawk awm e.

Exit mobile version