Hna zawng lai leh hna nei tawhten ngelnghet zawka an eizawnna an sawhngheh theihna atan anmahni pui turin February 10-14 hian Aizawlah ‘LESDE Kut’ neih a ni dawn.
LESDE minister Lalnghinglova Hmar sawi danin, sawrkar laipui Ministry of Mirco, Small, Medium Enterprise (MSME) National Scheduled Caste/ Scheduled Tribe Hun nen tangdunin buatsaih a ni a. MSME, self help group, kuthnathawktute, hna zawng lai, entrepreneur, department inrelbawlna atana mamawh bungrua siamtute leh service petute thil siam leh service tih lar leh pholan tumna a ni.
LESDE Kut-ah hian department hmalakna pakhat angin hna zawng laite tan Job Fair buatsaih tum a ni a. Hna zawng lai leh zirlaiten an hlawkpui ngei an beisei avangin tel vek turin an duh hle tih a sawi.
“Zirlai, an hmalam hun tur chiang lote tan career guidance neih a nih dawn bakah district pathuma Industrial Training Institute hnuaia skill development course hrang hrang buatsaihtute, Mizoram Youth Commission leh Sub Regional Employment Exchange pawh an inpho dawn,” a ti.
Kut-ah hian hna zawng lai leh hna ngelnghet lo thawk mekten hna zawnna kawnga pui theitu, inziahluh theihna hrang hrangah a hmunah a inziahluh theih dawn tih minister hian a sawi a. Mizoram-a hna thawka rawn lut, central PSU – NHIDCL, Power Grid Corporation, IOCL, FCI, NEEPCO leh NFR Railways a hna awm leh luh theih dan seminar neih a ni dawn tih a sawi bawk.
Heng bakah hian kuthnathawktute tan MBOCCWWB-a inziahluh theih dan, inziaklut tawhte tana puih zui theih dan hawn a ni dawn a. Exhibition cum stall engemawzat hawn leh buatsaih a ni dawn tih a sawi a ni.
Eizawnna lama thalaite pui turin ‘LESDE Kut’ nei dawn
