Ek thli luankhawmna turin
Aizawl-ah pipe phum mek
PHE minister Prof. Lalnilawma chuan Thawhtanni zan khan AMRUT-2.0 hnuaia hmalakna pakhat, septic tank atanga chhuak ek tui lakkhawm a, sawngbawl thianghlimna tura kawngpui verh hna thawh mek, Dawrpui Bazar Bungkawn – Vaivakawn road ami chu a hmunah a endik a, sawrkarin he project hi a hlawhtlin ngei a duhin a ngaipawimawh tih sawiin, a, a hun taka zo turin contractor a chah.
Project hming hi ‘Sewerage & Septage Treatment Works for Zone-7, Aizawl City Small Bore Sewer, Tuikual Lui (AMRUT 2.0)’ a ni a, Rs. 37,76,85,198 senga thawh zawh tur a ni. Contractor hi Ace Alliance Pvt. Ltd. Guwahati an ni a, 2024 August 5 atanga thawk tanin, 2026 August 5 ralhmaa zawh tur a ni. Hemi hnu kum hnih chhung (2028 August 5 thleng) enkawlin an vil zui ang. Pipe phum tur hi km. 31.41 a thui a ni a, tunah km 3.6-a thuiah phum a ni tawh. Zan dar 9.00 atanga a tuk zing dar 5.00 thleng hna hi thawh thin a ni.
He project hmang hian Tuikual luia thli luangkhawm veng 10 – Dawrpui, Chawnpui, Tuikual North, Tuikual South, Dinthar, Dawrpui Vengthar, Vaivakawn, Kanan, Khatla leh Zarkawt-ah pipe phum tur a ni a. Ek thli chu tui dawt hmanga lakhawmin sawngbawl thianghlim tur a ni. Ek thli leia thamral emaw luikawra paih thin tihbo tumna a ni a. Hei hian soak pit mamawhna tiboin vantlang hriselna atan hmasawnna leh leimin laka invenna a nih beisei a ni.
He pipe hmang hian septic tank atanga thli tuiril lakkhawm hi sawrkar ram MINECO-ah a tihthianghlimna hmun – Sewage Treatment Plant (STP) a sawngbawl tur a ni a. Heta thli tihfim hi leitha leh thildanga hman theih a ni. STP hian nikhatah ek thli litre maktaduai 3.5 a tithianghlim thei dawn a, he hmunah vek hian nikhata septic tank-a ek litre 30000 sawngbawl thei tur Faecal Sluge Treatment Plant dah bawk tur a ni.
PHE minister chuan khawpui kawngpui awm danin a zir loh avangin chhun lamah hnathawh a rem loa, lirthei veivak tamna hmun a nih vangin zan rei hnuah hna thawh tan theih chauh a ni a; khawl lian hmanga hna thawh a nih vangin kawngpui leh a chhehvela chengte tan thawm bengchheng a siam dawn tih sawiin, mipui leh khawtlang hruaituten khawtlang tana tha tur tih hriaa dawhthei taka an dawnsawn thin vangin lawmthu a sawi a ni.
Minister chuan Aizawl khawpui bit takah septic tank tui luanfimna tur soak pit nei tha lo leh nei lo hial pawh kan tam avangin septic tank leak leh paih ruah ngai kan tam a, septic tank tui hi a rimchhiat piah lamah natna hrik pai a nih vangin him taka dehral ngai a ni a, he project hian hei hi a tum ber pawh a ni tih a sawi bawk.
Ek thli luankhawmna turin Aizawl-ah pipe phum mek
