El Clasico hnehtu Real Madrid
Inrinni zan khan season kal laia a vawikhatna atan Barcelona leh Real Madrid an intum a, he league Clasico-ah hian mikhual Real chuan siphur hmasa zet chungin Nou Camp-ah 2-1 hnehna an changlet a, Jude Bellingham bawk a langsar leh ber.
El Clasico a khelh vawikhat-naah England international Be-llingham hian goal hnih khung nghalin, Spain leilung a thlen hnua Spanish La Liga a ni emaw Europe a ni emaw eng kawtkaiah pawh a club thar tan goal khung a thulh duh lo a, kartawp El Clasico-ah pawh mikhual siphurh a sut zet hnu hun pekbelhah chakna goal a tilut zui leh zat a, Real Madrid tana La Liga match vawi 10 a khelh tawhah goal 10 a ngah der tawh!
Spanish football inkhel lianah hian Ilkay Gundogan chuan minute rukna lekah Barca hma-hruaina goal thunin, chawlhlawk thlengin Bernabeu club-in an siphurh an sut zo lo.
Second half laihawl thlen dawn minute 68-ah Bellingham chuan hla derh dawrh atangin mikhual siphurh sutna goal a thlawhlut a; hun pekbelh minute hnihna a kal mek laiin England midfielder bawk hian Luka Modric siamsak atangin he match-a a goal hnihna leh Real chakna goal ni zui ta a thawh leh a, a Real career-a lasi thawnthu a ziah mek chu nung takin a chhunzawm kal zel!
Kum 20 mi lek la ni Bellingham hian tun season kal laiah club leh ram tan belhkhawmin match 16-ah goal 14 a khawl tling tawh.
Cristiano Ronaldo, Karim Benzema tihte awm loh hnua Real Madrid rohlu leh an goal hero rawn ni chho mek Bir-mingham City midfielder hlui Bellingham hi, tarlan tawh thin angin, kumin nipui lai khan Los Blancos chuan Bundes-liga club Borussia Dortmund atangin euro maktaduai 103 (£88.5m) lawihin an senglut a, tun thlengin a man zat phu hian a la khel kal zel rih.
Real tan inelna hrang hranga game 13 a khelh tawh atangin Englishman hian goal 13 khung tling tawhin, assist vawithum a nei tawh bawk a, match thumah chiah goal khung loh a nei!
Inrinni zan Clasico-a Spanish champion an hneh hnuah Madrid club hian hmahruaitu Girona chu point-ah nihrualin, goal diffe-rence-a an san zawkna hmangin La Liga table-ah hma an hruai a, pathumna Barcelona lakah point liin an sang.
Girona hian Zirtawpni khan sikhat faia an mikhual Celta Vigo hnehin point thum nen kartawpa an hna an zo a, Inrinni zanah point thum hmu ve lehin Real-in Girona nekchhuakin table-ah a ler an luah chho ve leh ta a ni.
Inrinni La Liga inkhel dangah Las Palmas chuan 2-1-in mualneitu Almeria an hneh a; Mallorca leh an mikhual Getafe chu goal awm loa inhnehtawkin, Cadiz leh an mikhual Sevilla chu 2-2-in an inhnehtawk thung.
El Clasico hnehtu Real Madrid
