MLA inthlanpui neih tura Serchhip district-a Assembly bial pathuma candidate-ten an agent atana an hman te chu Thawhlehni khan district election officer David Lalthantluanga chuan kokhawmin, training an nei a. Hriatthiam loh lai inhrilhfiah leh Election Commission-in zawm ngei ngei tura dan a siamte inhrilh nawn a ni.
He hun hmanpuitu Serchhip district-a Assembly bial tana general observer V. Sampath chuan political party leh independent candidate aiawha telte chu inthlan felfai, thianghlim leh huapzo a awm theih nan thawhhopuiah a sawm a. Chan tha bik leh duhsak bik awmloa intluktlanga candidate tin ten inthlan an hmachhawn theihnan Election Commission of India chuan Mizoram pawn atangin officer-te observer turin a tir thin a tih a sawi. Election agent-te chu an hriatfiah loh lai engtik lai pawhin a zawh theih reng tih a hrilh a ni.
Hrangturzo returning officer (RO) Lalnundika leh Tuikum RO HD Lalpekmawia ten model code of conduct leh expenditure vawn dan tur an sawifiah a. Serchhip ARO Rebecca Laldinmawii Hrahsel chuan inthlan kaihhnawiha candidate-te leh an agent-ten an hriat tur pawimawh a sawifiah.
Thutkhawmah hian Serchhip district-a Assembly constituency tina candidate agent-te an tel kim a ni.
Election agent-te hriat tur sawi
