Ella Langley “Choosin’ Texas”-in Taylor Swift record lehpelin, Hot 100-ah a No.1

Ella Langley “Choosin’ Texas”-in Taylor Swift record lehpelin, Hot 100-ah a No.1
Ella Langley hla hit “Choosin’ Texas” chu Billboard Hot 100 (US singles) chart-ah a No.1 a, he chart-ah hian kar li a No.1 tling ta. Hetihrual hian Olivia Dean ‘So Easy (To Fall in Love)’ pawh top 10-a a lang.
Ella Langley “Choosin’ Texas” chu February thla laihawl khan chart No.1-ah a rawn debut a, chumi hnuah March thla tirah a vawi hnih nan rawn No.1 lehin, tun thlengin a No.1 ta zel a ni. Heti hian kar li a No.1 tling ta a, he hla hi Billboard Hot Country Songs chart-ah kar 17 a No.1 tawh bawk a, hmeichhe zaithiam zingah heng chart pahniha hla pakhat No.1 nih pui ve ve thei zinga Hot 100-a No.1 ni rei thei ber a ni ta a ni. Kar kalta khan Taylor Swift hla “We Are Never Ever Getting Back Together” record a rawn nih ruala, tunah chuan Swift record a lehpel ta a ni.
Billboard Hot Country Songs chart leh Billboard Hot 100-a hla No.1 pui ve ve thei hmeichhe zaithiam an la tam lo khawp mai a, Ella Langley leh Swift bakah Beyonce “Texas Hold ‘Em” chu 2024 khan No.1 rawn ni ve vein, Hot 100-ah kar hnih a No.1 thei a, midang chu Dolly Parton (Kenny Rogers nena an zai dunna) “Island in the Stream” chu 1983 khan heng chart pahnih hian a No.1 ve ve tawh bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
“Choosin’ Texas” hian kar khat chhungin stream maktaduai 21.8, radio airplay ngaithlatu maktaduai 43.6 leh sales 6,000 a la nei thei a, hei hi a kar li nan chart-ah a No.1 pui leh ta a ni.
Olivia Dean “Man I Need” chu No.2-ah a la awm a, he chart-ah hian kar nga chhung No.2 a ni tawh a, hetihrual hian a hla dang ‘So Easy (To Fall in Love)’ chuan stream maktaduai 11.6, radio airplay ngaithlatu maktaduai 32.2 leh sales 2,000 neiin, No.11 atangin No.9 a kai a, he chart top 10-a a hla lang thei pahnihna a ni.
Chart No.1 hlui Bruno Mars “I Just Might” chu No.3-ah bawk awm lehin, he hla hian kar khat chhungin radio airplay ngaithlatu maktaduai 81.5 a nei thei a, 2024-a Shaboozey ‘A Bar Song (Tipsy)’ hnua kar khat chhunga airplay maktaduai 80 kai leh thei hmasa ber a ni.
Chart No.1 hlui pahnih-in top 5 kharin, Alex Warren “Ordinary” chu No.5 atangin No.4-ah a insawn leh hret a, HUNTR/X “Golden” chu No.7 atangin No.5-ah a insawn ve leh ta bawk.
PinkPantheress leh Zara Larsson “Stateside” chu No.6-ah bawk a la awm a, chart No.1 hlui Taylor Swift “Opalite” chu No.10 atangin No.7-ah a insawn leh a, Swift hla dang, No.1 hlui bawk ‘The Fate of Ophelia” chu No.8-ah bawk a la awm a, Harry Styles “American Girls” chu No.4 atangin No.10-ah a tawlh ve thung.