Ella Langley-i’n record siamin Billboard Hot 100 Top 2-ah a lang

Ella Langley-i’n record siamin Billboard Hot 100 Top 2-ah a lang
Ella Langley chuan chart history siamin, a hla “Choosin’ Texas” chu a kar kua nan Billboard Hot 100 chart-ah a No.1 a, Langley hian Billboard Hot 100 (US singles) chart history siamin, country music chauh record thin hmeichhe zaithiam zingah a ruala Hot 100 chart No.1 leh No.2-a hla nei thei hmasa ber a ni. Hetihrual hian a hla dang “Be Her’ chu No.2 a kai thar ve ta bawk. Hetihrual hian Tame Impala & JENNIE ‘Dracula’ chu top 10-ah a rawn thar ve ta bawk.
Billboard Hot 100 chart hi kum 67 an lo kalpui tawh a, hetih chhung zawng hian country music chauh record thin zingah tum khat Hot 100 chart-a No.1 leh No.2 kai thei hla nei hmasa ber a ni, hmeichhia chauh ni lo, mipa zaithiam lak tel pawhin Langley hi a pahnihna a la ni pha tho. Mipa lamah pawh hetiang tithei hi Morgan Wallen chiah a la awm a, nikum May thla khan Hot 100 No.1 leh No.2-ah a rualin a lo nei tawh a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay ngaihthlatu neih tam dan leh sales data te chu tehna pawimawh a ni.
Ella Langley “Choosin’ Texas” hian kar khat chhungin US-ah stream maktaduai 26.6 a la kei thei a, radio aiplay pawhin ngaithlatu maktaduai 47.8 a la nei thei a, sales 8,000 a tling thei bawk a, hei hi a kar kua nan chart-ah a No.1 pui leh ta a ni.
He hla hi February thla laihawl khan chart No.1 a rawn ni a, he chart-a Ella Langley hla No.1 kai thei hmasa ber a ni a, tunah a hla dang ‘Be Her’ chu No.5 atangin No.2-ah a invawrh kai ve leh ta bawk a, tihian tum khatah No.1 leh No.2-ah a hla a lang dun ta a, country music chauh record thin hmeichhe zaithiam zinga hetiang tithei hmasa ber a ni ta a ni.Country music chauh record thin ni kher lo zingah pawh Ella Langley hi chart tum khata No.1 leh No.2-a a lang kawp thei 27-na a ni bawk.
Chart No.1 hlui Olivia Rodrigo ‘Drop Dead’ chu No.4 atangin No.3 a kai thar le ta a, Olivia Dean ‘Man I Need’ chu No.3 atangin No.4-ah a tawlh a, chart No.1 hlui Bruno Mars ‘I Just Might’ chu No.2 atangin No.5-ah a tawlh a, Olivia Dean hla dang ‘So Easy (To Fall in Love)’ chu No.6-ah bawk la awmin, chart No.1 hlui Alex Warren “Ordinary” chu No.8 atangin No.7-ah a in sawn a, Ella Langley hla dang Morgan Wallen nena an thawh dunna “I Can’t Love You Anymore’ chu No.8-ah a la awm a, Kehlani ‘Folded’ chu No.10 atangin No.9-ah a insawn ve leh ta bawk.
Tame Impala leh JENNIE ‘Dracula’ chuan stream maktaduai 12.1, radio airplay ngaithlatu maktaduai 23.1 leh sales 2,000 neiin, No.18 atangin No.10-ah a invawrh. He hla hi nikum October khan Tame Impala hian solo-in a lo tichhuak tawh a, kumin February khan a duet version hi an tichhuak le a, an pahnih tan hian Hot 100 top 10-a an lan vawi khatna veve a ni.
JENNIE hi BLACKPINK member zinga group ang ni lo, soloist anga Hot 100 top 10-a lang thei pahnihna a ni a, BLACKPINK member dang ROSE chuan Bruno Mars nena an thawh dunna ‘APT.’ avangin chart No.3 a lo kai tawh bawk.
Heti hian a zawnin kar riat chhung chu Hot 100 chart top 10-a hla pasarih chu hmeichhe sak a ni ta a, August – October 2014 khan hetiang hi a lo thleng tawh bawk a ni.