Elon Musk a la hausa ber
Billionaire 3,000 chuang an awm
Khawvela mihausa tawntaw zingah technology lama hausa leh retail lama huang zauh tha ten hma an la hruai zel a. Elon Musk hausakna chu dollar tluklehdingawn 342 angin an chhut a, khawvela hausa ber a la ni a, Meta hotupa Mark Zuckerberg leh Amazon neitu Jeff Bezos ten an dawt. Forbes list atanga a lan danin khawvelah billionaire mi 3,028 an awm tawh a, US-ah an tam ber a, China-in dawtin, India pawh billionaire tamna ram a ni ve bawk.
Forbes Billionaires List a mi 3,028 lang te hausakna belhkhawm hi dollar trillion 16.1 a tling. Trillion chu a tam tawh lutuka chhiar ngaihna pawh a awm tawh lo, chhiar-sen-loh tak tak a ni ber mai. Trillion chu 10,00,00,00,00,000 (bial ringawt pawh 12 a awm!) a ni.
US-ah billionaire an tam ber a, mi 902 an awm a, China-in dawtin (Hong Kong hi China-ah an chhiar tel) 516 an awm a, India-ah 205 an awm bawk.
Elon Musk hi electric vehicle leh space technology lama sumdawng a ni a, Mark Zuckerberg hi artificial intelligence leh metaverse lama sumdawng a ni ve thung a, heng mihausa tawntaw pahnihte han hmathlir thui tak neiin, technology thar chu an hausakpui a tih loh theih loh.
Mark Zuckerberg hausakna hi dollar tluklehdingawn 216 niin an chhut a, Jeff Bezos nen an inhnaih hle a, Bezos hausakna hi dollar tluklehdingawn 215 niin an chhut ve thung.
India pahausa, Reliance leh Jio neitupa Ambani chu hausa top 10-ah a lang ta lo tlat mai. Forbes chuan Ambani hausakna hi dollar tluklehdingawn 92.5 angin an chhut a, billionaire list-ah 18-na a ni ta a, hetihrual hian Ambani hi India mai bakah Asia-a pahausa ber a la ni zui tho a ni.
Khawvel pahausa zual pathum Elon Musk, Mark Zuckerberg leh Jeff Bezos te hi kan hre lar viau a, an sumdawnna te pawh kan hre bel tawh viau ang. Top 10-a lang midang te pawh hi kan hriat lar tawh sa an awm nual ang a.
Palina Larry Edison hi Oracle co-founder a ni a, kum 80 mi a ni tawh. Software leh cloud computing lam atanga inchheh lian a ni. Pangana, Bernard Arnault & Family hi luxury brand LVMH neitu a ni a, khawvela luxury brand hriathlawh Louis Vuitton, Dior leh Sephora neitu an ni.
Parukna Warren Buffett paw kum 94 mi ni tawh mah se Berkshire Hathaway-ah CEO a nih bakah investor a ni a, pasarihna Larry Page hi Google co-founder a ni a, pariatna Sergey Brin pawh Google co-founder a ni a, pakuana Amancio Ortega hi fashion khawvel lam atanga inchhek lian niin, Zara founder a ni a, sawmna, Steve Ballmer hi Microsoft CEO thin a ni a, tunah chuan Los Angeles Clippers neitu niin, technology, sports leh sumdawnna te chu a sum hmuhna lian an ni.
Forbes Billionaires List
Top 10 ($ in billion):
1. Elon Musk $342
2. Mark Zuckerberg $216
3. Jeff Bezos $215
4. Larry Ellison $192
5. Bernard Arnault & Family $178
6. Warren Buffet $154
7. Larry Page $144
8. Sergey Brin $ 138
9. Amancio Ortega $124
10. Steve Ballmer $118
Elon Musk a la hausa ber Billionaire 3,000 chuang an awm
