Eminem chuan a album tar ‘The Death of Slim Shady (Coupe de Grace)’ chu Zirtawpni kalta khan a tlangzarh a, karleh Billboard 200 (albums) chart-ah Taylor Swift album ‘The Tortured Poets Department’-in a zawna kar 12 chhung No.1 dinhmun a lo chelh tawh chu a luahlan thei dawn niin an chhut.
Billboard 200 hi kar khat (Zirtawpni – Ningani) chhunga US-a album hralh that dan atanga teha chart ranking siam thin a ni a, he chart-ah hian Taylor Swift ‘TTPD’ chu a zawnin kar 12 chhung a No.1 tawh a, a No.1 chhung hian zaithiam Billie Eilish, Gracie Abrams leh Zach Bryan te pawhin album thar an tlangzarh nain, Swift hi an nawr tawlh zo tlat lo.
Mahse, tunah chuan Swift hian challenger rit tak a nei ta a, Eminem hi best-selling solo recording artists of all-time te zinga mi niin, RIAA certified diamond-album pawh pahnih a nei tawh a, a album hnuhnung 10 chu chart No.1 an la kai vek bawk. Tunah hian kum li chhung album thar a neih tawh loh hnuah ‘The Death of Slim Shady’ nen a rawn kir leh ta a, kum 25 vel kalta a a rawn lar chhuahna, a alter-ego, Slim Shady a dahbona tur album a ni.
He album-a Eminem hla 19 te chu Spotify Daily Top Songs USA cart-ah top 100-ah an lang vel a, tunkar laihawl chart-ah pawh an la che tha hle a, he album-a a hla pakhat ‘Houdini’ phei chu Billboard Hot 100 (singles) chart No.2-ah a debut nghe nghe a nih kha, a hla dang, Big Sean leh BabyTron te nena an thawhhona ‘Tobey’ pawh a che tha thawkhat.
Eminem album hnuhnung ber 2020-a a tlangzarh ‘Music to Be Murdered By’ kha a tlangzar karah US-ah 2,79,000 hralhin chart No.1-ah a debut a, a album thar pawh hi 2,00,000 chunglam hralh leh ngei tura chhut a ni a, Taylor Swift ‘TTPD’ hi kar kalta kan 2,00,000 an hralh tling tawh lo a, hei vang hian Eminem hian chart No.1 kai thei album 11-na a nei thei ngei dawn niin an chhut a ni.
Eminem-a’n Billboard 200-ah Taylor Swift a nawr sawn thei ang em?
