Mizoram State Project Monitoring Committee chuan hna thawh mek a endiknaa tha lo leh him lo a tih, siamtha tur leh entha leh tura thu a rawn chuan zawm a hlawh lo hle.
Eklavya Model Residential School Tlungvel building sak chu thla thum kalta atang khan Mizoram State Project Monitoring Committee (MSPMC) hian a endik tan a. Academic building, mipa leh hmeichhe hostel, guest room, principal leh thawktu dang quarters sak zawng zawngah duhthusam lo lai a awm a, hmun thenkhatah phei chuan a luahtu – thawktute leh zirlai tana him lo thei, siamthat ngai an hmu nual a, chu’ng thil chu siamtha leh turin an ngen a ni.
An tlawh hmasak hi kumin June 7 a ni a, July 17 khan an tlawh leh a, siamtha tura thu an rawn zawng zawng tih theuh deuhthaw hian zawm a hlawh mai ni loin, hna la zawh lohah pawh thawktu an awm mumal lo tih MSPMC hian an hmu.
He project hi RCC building engemawzat sak hna a ni a. Sanction amount chu cheng vaibelchhe 24 a ni a, agreement amount chu cheng vbch. 23.3361 a ni. Hna hi restricted tender hmangin VRS Construction Zonuam Aizawl hnenah pek a ni a. Work order hi 2019 December 20-a pek niin, thla 24 chhung (2021 December 20) a thawh zawh tura tih a ni. Contractor hian tum hnih pawhsei ngenin, 2025 June 30-a thawk zo tura pawhsei sak a ni a, pawhsei an dil leh dawn mek niin MSPMC report-ah tarlan a ni.
Hetihlai hian report an dawnah chuan hna thawh chin hi zaa 75 vel a ni a, hnathawhna sum pekchhuah tawh chu zaa 94 (vbch. 20.91) a ni thung.
MSPMC-in a endik hmasaka a hmuh dan leh siamtha tura a tih zingah, hmanraw tha tawk lo hman leh quality test neih mumal loh; building/ room inchung tuilting nasa, far leh hnam nasa deuh vek; room, quarters, toilet a nih tur ang pha lo leh chep; pipe fitting dik lo leh cross ventilation awm tha lo; tuiluankawr tha lo; hmun thenkhatah zirlai/ thawtu tan him lo theia nghet lo leh siam tha lo awm a awm thu report kimchang tak a siam a. Siamtha tura tih a nih lain, endik thawhhnihnaah hian siamthat a la awm lo fai deuh vek tih an hmu tih an sawi a ni.
A tlang an kawmnaah, hmanraw hrang hrang quality test an neih ngai loh thu contractor hian MSPMC Inspecting Team a hrilh tih a sawi a. Concrete chak zawng result hmuh tur a awm loa, work programme leh pegister pawimawh an nei mumal loa, project management plan a awm loh avangin project kalpui dan pawh a mumal lo hle a, hna enkawltu officers leh contractor hian an hnathawh an ngaipawimawh lo hleah an ngai tih an sawi.
“Hnathawh that leh that loh test felfai tak tih a nih loh thu, hna tan a nih hmain hnathawhna hmanrua – rora, balu, steel, cement adt. a that leh that loh test vek phawt a, hmanraw tha chauh hman tur tih thu, concrete chak zawng test tling ngei a ni tur a ni,’ tiin thu hnutchhiah a ni a. Hei hi a engamah tih hlawhtlin a ni lo,” MSPMC report hian a ti.
He project hi MSPMC Inspecting Team hian tum hnih endik tawhin, hna tha zawka thawh a nih theihnan rawtna siamin kawng kawhhmuh tawh mah se, a rah tha hmuh tur a awm lem lo, tiin, “Project enkawl dan tura enkawl a ni lo leh hna tling lo tlinga pawma pawisa tam tak pek chhuah a ni chu a fel lo hle a, thuneituten en zui ngei se a duhawm hle,” a ti.
Hnathawh loh bill siam lawk a, contractor hnena pek tam tham tak a awm ngei nia lan thu hi sawiin, teti taka hna chhia a nih bakah a hna kal chak lo lutuk chu a bul berah chuan nodal department enkawl dan leh hna kal nena inhen lo taka sum pek chhuah tam chu harsatna thlentu ber a ni tih a chian thu MSPMC hian a sawi bawk.
EMRS building sak tha loah State Project Monitoring Committee thu zawm lo hle
