Season chhe zet an hmangliam a, beiseina thar nen Parthianni zanah English Premier League season thar bul tan ve bawk mah se Manchester United chu sikhat faiin an khelmual hman thiam ngei maiah Arsenal-in an hneh leh a, he team-ah hian a eng lai hi nge dik lo tih zawhna a piang lo thei lo ang.
United player-te’n meng khup lap chunga Old Trafford an chhuahsan leh tak hnu khan Manchester United captain hlui Gary Neville chuan a eng lam hawi tawngkam a cheh a, league bultanna inkhelah Gunners ngam loin tlawm mah se kha game-ah khan a beiseiawm lam hmuh tur a tam thu a sawi a, tun dinhmuna an mamawh ber chu ‘goalkeeper thar’ a nih thu a sawi.
Gunners leh The Red Devils inbeihnaa danglamna kan hmuh langsar tak pakhat chu goal ven thiamna (goalkeeping quality) kawnga team pahnih inthlauhna kha a ni.
Cameroon goalkeeper Andre Onana hmun luahtu second-choice goalie Altay Bayindir khan Declan Rice-a cross dang zo loin minute 13-na lekah Riccardo Calafiori chuan mikhual hmahruaina leh sikhat faia Arsenal chakna goal ni zui ta a khung a, United Turkish keeper-in dem a hlawhna inkhelah tlawm chungin Red Devils-in season bul an tan!
London club hmachhawn tur squad remkhawm laia kum 29 mi Onana an telh loh chhanah khan zawhna a piang a, goal-veng rintlak melh kal mek Manchester United-in an keeper hlui, tuna kum 34 mi ni tawh David de Gea kha Serie A club Fiorentina atanga sengluh an tum boruak nen inkaihhnawihna nei niin sap media-te’n an tarlang!
Gunners goal-veng David Raya thung khan Manchester United lei thar pahnih Matheus Cunha leh Bryan Mbeumoe-te’n chawl loa ‘attack rusum’ an thlak miah miah kha a lo dangchat hmiah hmiah a, London hmar veng atanga fehchhuakte’n point thum hmu chungin season bul an tan theih phah a tih loh theih loh ang!
Sky Sports tana Gary Neville Podcast-ah England defender hlui hian goalkeeper nei tha thin United chu goal-ah an nem ta deuh tih sawiin, “Manchester United-in an palzam theih miah loh tur thil pakhat chu goalkeeper thar zawn hmuh thuai thuai an ngaihna lai zawn hi a ni.
“He team-ah hian kum 20 lai tawnhriat nei tawh ka nih avangin ka thu sawiah hian ka chiang tawk a, Peter Schmeichel leh Edwin van der Sar-te kha kum sarih kum riat vel ve ve ka khelhpui bawk a; defender-te’n an dan zawh loh hnu pawha hnek chhuak thei, save leh mai thin, boruaka tha, six-yard box chhung thunun hneh tlat si ang chi kha an mamawh chu a ni,” a ti.
Neville hian nipui bazar hun chhung la awmah hian Manchester United chuan an mamawh hruailut tura sum an phawrh emaw loan tal pawha chhawr tur an mamawh thu tarlang telin, “Tunhnai chawlhkar hnih liamta chhung khan Emi Martinez (Argentina & Aston Villa) leh Gianluigi Donnarumma (Italy & Paris Saint-Germain)-te hming sawirik a ni.
“United tana anni pahnih that dan tur hi sawi ngai lo a ni. A chhan pawh Europe-a goalkeeper tha ber ber an ni a, an thiamna piahlamah hawiher leh nungchang ropui nei an ni tel bawk.
Italy tan European final penalty-a Donnarum-a ‘save’ kha kan hmu theuh ang a, milian (giant) ang mai a ni. PSG tan pressure sang tak hnuaiah game hraw tak tak khel reng a bawk.
Martinez ni se World Cup final khel tawh, Argentina champion-puitu langsar a ni,” tiin a club hlui mamawh nia a ngaih keeper pahnih a thlurbing nghal.
Gary Neville chuan sawizawmin, “Tun season-ah hian Manchester United mamawh hi a tam khawp a, chu’ng zingah chuan Ruben Amorim-a hian goalkeeper lama an harsatna hi a chinfel hmasak phawt a pawimawh dawn a, a chhan pawh goal an chhuah reng a, point an hloh kal zel a, chu chuan an lungphum a sawinghing zel a ni,” tiin home fans 72,000 zet tilunghnurtu goalkeeper ang kha chelh reng loa a thlaktu rintlak zawng hmu vat turin thurawn chang fel fawl tak a khilai!
An khelmualah tlawm mah se United kha season tawp ruala an sengluh rualkhat Matheus Cunha, Bryan Mbeumo leh Patrick Dorgu-te’n team tha zawkah an siam chho thei dawn niin a lang ve tho bawk!
United tlarhma luahtute khan Arsenal keeper David Raya kha pel zo ta chiah lo mah se buai takin an siam a, Mbeumo ball tauh pui zet dive chunga a save-te kha result hriltu a ni.
Season thara an league match hmasaberah pawh Mikel Arteta team khan set piece atangin an la hlauhawm reng tih an nemnghet leh nghal chat.
2023-24 season atanga chhiarin set-piece specialists Arsenal khan corner atangin league goal 31 tehreng an thun tling tawh a; hetih kawngah hian team dang aiin an chungnung fal nalh a; Unted laka an league goal hnuhnung pali zinga pathum pawh corner kick atang veka an hlawhchhuah a ni.
Chakna goal thuntu defender Calafiori pawh a thaw lian ham ham kher mai a, “Set-piece lama kan thawhrimna chuan vawiinah hlet a chhuah leh ta a nih hi,” a ti!
Old Trafford inkhelh bana away fans lamin an hlapui pakhat ‘One-nil to the Arsenal’ song an sak leh mup mup laiin tawpna hamrik rik rualin United player thenkhat chu khelmualah an thingthi hnawk!
Manchester United khan hun pumin shot vawi 22 zet neiin, vawi kaw shot nei ve chauh chunga target tum sarih fuh Arsenal lakah goal bawh ti na thawkhat mah se an mamawh ber goal an hlawhchhuak zo lo a, goalkeeper inthat hleih bawk si lai kha an tuar ta a ni ber!
Mualneitu team khan an mikhualte lakah ball 62% lai an chang a; Arsenal thung kha season hnuhnung pahniha runners-up ni ve ve thei khelh pawhin an khel chhuak zo lo a, mahse, a pawimawhber goal an thun bik tlat a ni!
Season tawp ruala Arsenal player sengluh pui ber Sweden striker Viktor khan a Premier League debut nghakchhuak mah se second half tir lamah lakchhuah a ni a, vawi khat khelhnaah a hlutna a pholang zo nghal mai lo.
Eng hi nge United mu tan ni zozai ?!
