Centre-ah sawrkar thlawp bik a nei dawn loa, eng party pawh sawrkar se harsatna a awm dawn chuang lo tih ZPM candidate Richard Vanlalhmangaiha chuan a sawi.
Champhai district hmun hrang hranga a campaign-naah Lok Sabha inthlan tura ZPM candidate hian, India ram inthlanpui awm turah mipuiin ZPM an thlantlin chuan central sawrkarah thlawp bik an nei dawn loa, independent an ni dawn tih a sawi.
“Kan ram kan hnam dinchhuahna tur leh thatna tur ang zel, issue based-in kan kal dawn a, development a tam thei ang ber Mizorama hnuhluh kan tum kawngah central-ah khuan eng party pawh sawrkar se harsatna a awm dawn chuang lo,” a ti.
Mizoram khaw tam takah MP Fund a awm tih hre lo an la tam niin Richard Vanlalhmangaiha hian a sawi a. Thlantlin a nih chuan rualkhai leh daihzai thei ang bera hman a tum dawn tih a sawi.
Zokhawthar chu Mizoram hmun pawimawh mai a niloa, India ram hmun pawimawh a nih avangin border trade mumal zawk leh hlawk zawk nei turin hma a la dawn tih a sawi a. “Ka hna pawimawh tur chu, state sawrkarin project tam tak central sawrkarah a thehlut dawn a, chutiang lo bawhzuitu tur chu ka ni,” a ti.
Kan thlai thar leh kutthemthiam hmanga kan thil dehchhuah phochhuah na’n Delhi ah sales emporium buatsaih an tum dawn tih a sawi bawk.
An party MP candidate campaign puitu, minister Lalnghinglova Hmar chuan MP candidate 6 awm zingah ZPM chuan central-ah zawmpui nei loin ZPM MP a ni tawp dawn a, NDA emaw INDIA emaw an zawm dawn loa, a thu azir zel leh Mizoram mipui duh danin an kal thei dawn bik tih a sawi. “Candidate dangte hi a mimalin tumah tha lo kan ti lo, kan danglam bikna erawh, tu thuhnuaiah mah ZPM MP hi a awm ve dawn lo,” a ti.
Eng party pawh sawrkar se harsatna awm dawn chuang lo – Richard Vanlalhmangaiha
