England Euros squad thlir ang
Nizan Wembley Stadium-a Iceland an infiampui result tarlan hman a nih loh avangin kan hma lawk European Championship khel tur England squad hi thlit ila; England manager Gareth Southgate chuan Euro 2024 squad a puan hma chhan sawifiahin, player-te’n rilru sakhat tak an pu hma thei ang a, an hma tournament atan an rilru pawh an sawrbing thei dawn niin a sawi.
England manager ni chunga game 94 a khelhpui tawhah Southgate hian match 58 chakpuiin, draw vawi 21 a nei a, kumin Euro-ah hian major title a lakpui dawn nge final pawh an thleng zo tawh dawn lo kan thlir ang.
Nizan an final warm-up match-a Iceland an hmachhawn hma Ningani khan Southgate hian Germany rama a hruai tur player 26-te hming a nemnghet a, a tira player 33 a thlanchhuah phawt atanga a thlitfim leh hnua lang ve ta lote chu – goalkeeper James Trafford, defender pathum – Jarrad Branthwaite, Harry Maguire leh Jarell Quansah, midfielder Curtis Jones leh forward pahnih Jack Grealish leh James Maddison-te an ni.
Liverpool centre-back kum 21 mi lek Quansah chu final squad-ah inhamtangin, nizan khan Wembley-ah Iceland hmachhawn tura beisei a ni.
Tunkar Thawhtanni khan Euro 2024 inbuatsaihna friendly match dangah England hian sithum faiin St James’ Park- a an mikhual Bosnia-Herzegovina an sawp a; nizana an infiampui leh Iceland erawh Euro 2024 khel lo tur niin, kumin March thla play-off match pakhatah khan 2-1-in Ukraine an hneh lo a, Germany an thleng zo ve ta lo a ni.
July 2021 khan hripui avanga a hun sawnhlat Euro 2020 final-ah England hian penalty petah 3-2-in Italy an hneh lo kha a ni a, kum thum a liam a, Germany ram tournament khel tur squad-ah hian Italy game-a kan hmuh Maguire, Kalvin Phillips, Raheem Sterling, Mason Mount, Jordan Henderson, Marcus Rashford, Jadon Sancho leh Grealish-te an lang ve ta lo a, he’ngho tel lo hian final thleng zo leh tak ang maw?
England squad
Goalkeepers: Dean Henderson (Crystal Palace), Jordan Pickford (Everton), Aaron Ramsdale (Arsenal)
Defenders: Lewis Dunk (Brighton), Joe Gomez (Liverpool), Marc Guehi (Crystal Palace), Ezri Konsa (Aston Villa), Luke Shaw (Manchester United), John Stones (Manchester City), Kieran Trippier (Newcastle), Kyle Walker (Manchester City)
Midfielders: Trent Alexander-Arnold (Liverpool), Conor Gallagher (Chelsea), Kobbie Mainoo (Manchester United), Declan Rice (Arsenal), Adam Wharton (Crystal Palace)
Forwards: Jude Bellingham (Real Madrid), Jarrod Bowen (West Ham), Eberechi Eze (Crystal Palace), Phil Foden (Manchester City), Anthony Gordon (Newcastle), Harry Kane (Bayern Munich), Cole Palmer (Chelsea), Bukayo Saka (Arsenal), Ivan Toney (Brentford), Ollie Watkins (Aston Villa)
Original 33-man shortlist a\anga paihte: James Trafford (Burnley, goalkeeper), Jarrad Branthwaite (Everton, defender), Jarell Quansah (Liverpool, defender), Harry Maguire (Manchester United, defender), Curtis Jones (Liverpool, midfielder), Jack Grealish (Manchester City, forward), James Maddison (Tottenham, forward)