FIFA Women’sn World Cup khelh mek chu August 16, Nilai tlai khan semi-final hnuhnung zawk khelh a ni a. England chuan inelna thlengtu Australia chu 3-1 in an hneh a, a vawi khat nan World Cup final an lut. Final-ah final la thleng ngai lo ve ve England leh Spain an inhmachhawn dawn a, hmeichhe World Cup-ah champion thar an awm ngei dawn.
Stadium Australia, Sydney-a inkhel Australia leh England te hi an inhnehtawk viau a, inkhel hmuhnawm an lantir. Goal thun tumin an innawr na tawn viau a, goal an thun lawk thei lo ve ve. Chawlhlawk dawn hnaih minute 36-naah Ella Toone chuan England hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah mualneitu Australia in goal thun ngei tumin an mikhualte an nawr a, inkhel hmuhnawm zawk an chhawpchhuak. An muala inkhel an ni a, mipui thlawpna an dawng tha bawk a, huangtau takin an inlan. Na taka an khingpuite an nawr rah an seng a, minute 63-naah Sam Kerr chuan goal thunin an si phurh a sut a, inkhel a hmuhnawm leh zual phah. An khingpuite nen an inhnehtawk thar leh hnuin Three Lions hian chak ngei tumin tan an khawh thar leh nghal chat a, goal an thun leh thuai. Minute 71-naah Lauren Hemp chuan hma an hruai nawn leh na goal a thun a, 2-1 in hma an hruai.
Inelna thlengtu Australia in an si phurh sut nawn leh ngei tumin thapui thawh bawk mah se an hlawhtling zo lova, goal an chhuah belh leh ta tlat zawk. Hun tawp dawn hnaih minute 86-naah Alessia Russo chuan England goal thumna goal thunin an hmahruaina a tizau. Hun tawp dawn ruaiah si hniha hma an hruai vangin chak theihna hun tha tak an nei a, final an hnaih kuarh tawh. Final luh theihna hun tha an neih chu hloh an tum lova, goal thun belh aiin an goal venhim an ngai pawimawh tawh zawk. Tichuan, hun tawp thlengin goal dang a luh belh thei tawh lova, England chuan 3-1 hnehna changin Women’s World Cup-ah a vawi khat nan final an lut ta nge nge.
Women’s World Cup final hi August 20, Pathianni zanah khelh a ni dawn a. Final la lut ngai lo pahnih; England leh Spain an inhmachhawn ang. England hi kum liam ta mai khan European champion an lo ni tawh a, World Cup-ah an champion thei a nih chuan trophy lian pahnih an kawl kawp a, leilung pian tirh atan football-a an tawnsan ber tum a ni ang. An khingpui tur Spain hi an khel tha tluang viau a, an huphurhawm ang.
Final khelh hma in semi-final-a vanduai pahnih; Australia leh Swden ten pathumna an inchuh ang.
England in final an lut
