Football rampui England national team manager ni mek Gareth Southgate chuan Euro 2024 zawh hunah a hna bansan a rilruk. Sout-hgate-a’n chhuah a tum hnaih vangin England hian an national team enkawltu tur an dap tan.
Gareth Southgate hnuaiah England hi an che chhe lem lo viau a, inkhel vawi 89 an hmachhawn atangin vawi 56 zet an chak a. An khingpuite nen vawi 19 an inhnehtawk laiin, tlawm zawkah vawi 14 an tang tawh bawk. Southgate hian kum 2016 a England a enkawl atangin inelna lian hrang hrang World Cup 2018, World Cup 2022 leh Euro 2020 ahte team a kaihruai tawh. World Cup 2018-ah semi-final a thlenpui a. Euro 2020-ah final a hruai thleng leh bawk. Inelna lianah chetha thawkhat viau mah se kum 1966 hnu lamah trophy lak an nei thei chuang lo thung.
England hi Euro 2024 khel tur zawnaah an chetha viau a, Group C-ah point rukin hma an hruai fal mek. Euro 2024 khel ngei tura ngaih an ni a, Europe khawmual inelna lianah hian Southgate hian a kaihruai leh phawt ang a. Inelna zawh rualin a hna bansan a tum a, a conrtact pawh sei tumna a nei rih lo. Euro 2024 zawhah manager thar an neih a ngai ngei dawna a lan vangin tun atangin an manager thar tur an dap nghal. Tun tumah hian England manager thar ni tura rinkai zual kan tarlang ang.
5 Sarina Wiegman
England hmeichhe team enkawl mektu Sarina Wiegman hi England mipa team enkawl tura rinkai zingah a tel. England hian an mipa team enkawl turin hmeichhia an la ruat ngai lova, Wiegman hi an ruat a nih chuan England hmeichhe manager hmasa ber a ni ang.
Sarina Wiegman hian kum 2021 khan Phil Neville thlakin England hmeichhe team a enkawl tan a, a chetha nghal hle. World Cup khel tur zawnnaah vawi 10 a chak zawnpui a, an khingpuite lakah goal 80 lai an thun laiin, goal an chhuah miah lo teh tlat. World Cup khel tur zawnna bakah Euro 2022-ah England hi a champion pui zui leh ta hial bawk. Euro-a an chet that hnuin, World Cup-ah final an thleng zui leh a, final-a an khingpui Spain lakah an vanduai ta tlat thung.
Euro 2022-ah England a champion pui vangin Sarina Wiegman hian Best FIFA Women’s Coach chawimawina a dawng. Hmeichhe team a chet thatpui em vangin mipa team enkawl turin an awt ta hial a ni.
4 Pep Guardiola
Manchester City manager ni mek Pep Guardiola hi manager ropui ber zinga mi a ni a. Manager rooui ber nih theihna hun tha tak a la nei cheu bawk. A team enkawl mek City-ah hian kum 2025 thleng contract a la nei a, a contract a hman zawh hunah City chhuahsan tura ngaih a ni. He manager ropui hian National team enkawl a hreh loh thu a lo sawi tawh thin a, hei hian Football Association beng a verh hle. England manager ni mek Gareth Southgate hian kum 2024 thleng contract a nei a. Pep hian kum 2025 thleng contract a nei thung si a, England tan City kalsan tur hmin theih a ni ang em tih hi zawhna lian tak awm mek a ni.
Pep Guadiola hian club hrang hrang, FC Barcelona, Bayern Munich leh Manchester City te a enkawl chhungin trophy lian (league titles & Champion league) 13 zet a la tling tawh. National team a enkawl a, trophy lian a lakpui thei a nih ngat chuan manager ropui bera chhal a ni zui reng tawh ang.
3 Lee Carsley
England Under 21 team enkawl mek Lee Carsley hi England manager thar ni tura rinkai zinga langsar pawl a ni teh tlat. European Under-21 Championship-ah Englan team a champion pui theih vangin FA in a lakah beiseina sang tak an nei mek. Carsley hi Republic of Ireland in an manager thar ni turin an sawm a, England hian chelh chhunzawm ngei turin hma an la ve bawk. Everton midfielder hlui Carsley hi England manager thar a ni nawlh a nih pawhin a mak hran lo ang.
2 Eddie Howe
Hun rei tak hnua Newcastle United chetthat pui lehtu, League Cup final hruai thlenga Champions League khel tura tlinpui zui leh tu Eddie Howe hian England manager thar ni turin rin a kai hle. Hun a lo kal hret ang a, FA in England manager thar ni turin a la dawr ngei tura ngaih a ni.
1 Graham Potter
Chelsea in an ban hnuah club enkawl nei lova awm mek Graham Potter hi club hrang hrangin an manager thar atan an awt a, an dawr hlawm. Chawlh hahdam rih a duh vangin Potter hian tu sawmna mah a bengkhawn duh rih lo. Brighton a chet thatpui em vangin Potter hi a lar thar hluai a, rin a hlawh chho hle. Club enkawl a neih loh mek vangin England tan dawr a awlsam phah dawn a. Manager tha tak a lo ni sa bawk nen England manager thar ni tura rinkai ber a ni rih.
England hi Europ 2024 khel turin an tling chiang tawh a. Euro 2024 khel tur zawnnaah khelh ruk chhung tlawm an nei lo zawn a, hei hi kum 2012 hnu lama an chet that zawn ber a ni mek. An chet that zawn vangin Germany-a neih tur Euro 2024-ah pawh champion tura rinkai an ni a. Real Madrid tana khel tha tak Jude Bellingham-a’n an boruak a chawi kang leh zual. Euro 2024-ah an champion thei a nih chuan Gareth Southgate hian ngaihnawm takin a hna a bansan thei ang.
England in Potter an hmutai
