Pathianni zing khan World Cup 2026 Group Stage khelh zawh a ni ta a. Group stage khelh zawhna niah England leh Croatia ten hnehna changin last 32 an lut. England leh Croatia hnuhnung zuiin Ghana in last 32 an lut ve bawk.
Football hmuchhuaktu an nih vanga leh an media te an chak em vanga boruak nei lian tak England in group champion ni tura chak mamawh chungin Panama an hmachhawn. Panama lakah 2-0 in hnehna an chang a, point thum hlu tak an hmu.
Football a an tawnhriat leh an dai chin ram inthlau viau mah se Panama hi England lakah an khel tha phian a, goal pawh an chhuah mai duh bik lo. Inkhel hmuhnawm pangngai takah goal lut a awm theih loh reng hnuin Jude Bellingham chuan Bukayo Sasa corner chhuih atangin goal a thun a, minute 62-naah England hmahruaina goal a thun.
Goal an thun hnuin England an khel tha sawt a, goal pawh an thun belh leh thuai. Season hmang tha tak Harry Kane chuan Jude Bellingham cross tha tak chu minute 67-naah fuh takin a tauh goal a, an hmahruaina a tizau. England goal hnihna thuntu Harry Kane hian World Cup-ah Englang tan vawi 15 khelin goal 11 a thun a. World Cup-ah bik England tana goal thun hnem ber ni reng thin Garry Lineker record siam chu goal khatin a khum chiah. Kane hian England tan vawi 117 khelin goal 82 a thun tling a, Three Lions tan goal thun hnem ber a ni tel bawk.
Team lian zawk England hian Bellingham leh Kane te goal thun hmangin Panama an hneh a, Group L champion ni chungin last 32 an lut. Thomas Tuchel enkawl England hian last 32-nah DR Congo an hmachhawn dawn a, last 16 luh theihna hun tha tak an nei. :ast 16 an lut a nih chuan Switzerland leh Algeria te inkhela chak zawk zawk an hmachhawn zui leh dawn bawk. Semi-final an thleng a nih chuan Brazil emaw Argentina emaw hmachhawn thei dinhmunah an ding a, final lut turin fiahna hautak paltlang an mamawh zui ngei dawn.
Group K a inkhel dangah last 32 lut thei tura tlawm thiang tawh lo Croatia chuan Ghana an hmachhawn a, inkhel hmuhnawm takah 2-1 a hnehna chang hramin last 32 an inhlangkai.
Last 32 lut tura tlawm thiang tawh lo Croatia hi point li hmua an chunga awm mek Ghana lakah chak ngei tumin an inlan a, khelh pawh an khel tha viau. Team hnihte an inhlau lo tawn a, goal thun ngei tumin tan an khawh nasa dun hle. Inkhel hmuhnawm takah goal lut a awm lawk loh hnuin Croatia tan Petar Sucic chuan minute 31-naah hmahruaina goal a thun a, 1-0 a hmahruai chungin chawlhlawk an hmang.
Chawlhlawk hnu lamah Ghana in goal an thun hmasa ber thung a, Derrick Luckassen chuan minute 73-naah goal thunin an si phurh a sut. Goal an chhuah vanga an dinhmun derthawng thar leh Croatia in goal thun ngei tumin tan an khawh thar leh a, hun tawp dawn hnaih minute 83-naah Nikola Vlasic chuan hma an hruai let lehna goal a thun a. An hmahruaina humhimin point thum hlu tak an hmu.
Croatia hi pahnihna ni chungin an tlang a, last 32-ah Portugal an hmachhawn zui dawn. Croatia lakah chak zo lo mah se African team Ghana pawh pathumna zinga titha zual pariat zingah telin last 32 an inhlangkai ve bawk a. Ghana hian last 32-ah Portugal kawng daltu Colombia an hmachhawn zui ve thung ang.
England leh Croatia in last 32 an lut
