UEFA European Under-21 Championship khelh mek chu Nilai zan khan semi-final khelh a ni a, champion lai England leh Germany ten hnehna changin final an lut.
Champion lai England hian Národny Futbalovy Stadión-ah Netherlands an hmachhawn. Football ram ropui pahnihte hi an inhnehtawk viau a, goal pawh a lut har hle. Beisei angin goal lut hma thei lo mah se hun tawp dawn hnaih lamah goal thum ngawt a lut a, hmuhnawm zawkin a tawp an khar. Three Lions hian Liverpool midfielder Harvey Elliott goal hnih thun hmangin hnehna pawimawh tak an chang a, final an lut.
Inkhel hmuhnawm takah hian goal lut a awm theih loh reng hnuin Harvey Elliott chuan minute 62-naah England hmahruaina goal a thun. Elliot goal thun hian inkhel a tihmuhnawm leh zual a, an si phurh sut tuma Netherlands tan khawh a hmuhnawm thei hle. Netherlands hian goal an chhuah atanga minute 10-na chiahah Noah Ohio hmangin an si phurh an sut.Netherlands in an si phurh an sut hi inkhel tihmuhnawm zualtu a ni a, goal thun tuma an innawr a hmuhnawm thei hle.
Goal khat ve ve a luh hnuin England an che fuh nawn leh a, goal hmahruai thuntu Harvey Elliott chuan hun tawp dawn hnaih minute 85-naah hma an hruai nawn lehna goal a thun. Netherlands in an si phurh sut ngei tumin tan an khawh a, England in an hmahruaina humhim tumin tan an khawh ve bawk a, inkhel tawp dawn tepah inkhel hmuhnawm zawk hmuh tur a awm. Inkhel hmuhnawm tak hi goal dang luh belh lovin a tawp a, England chuan Harvey Elliott goal hnih thun hmanga hnehna changin final an lut a. An trophy kawl mek humhim turin Three Lions hian vawi khat chak chiah an mamawh tawh.
Semi-final lehlamah Germany leh France an inhmachhawn ve thung. Inkhel hmuhnawm leh inhnehtawk tak ni tura beisei hi beisei phak lovin a tawp a, 3-0 ngawta hnehna changin Germany in final an lut.
Germany hian team lian France lakah bul an tan tha a, a tawp an khar tha tel bawk. Inkhel tan tirh lam minute 14 chhung leka goal hnih an thun hman rualin hung pangngai tawp hnu; hun pek belhah an goal thumna a thun zui leh bawk a. Hun pumpuiin an khingpui France hi an awp bet tluan a tih theih.
Germany tan hian Nelson Weiper chuan inkhel tan atanga minute 8-na lekah hmahruaina goal a thun nghal. Hma takah goal an thun vangin an phur a, goal an thun belh leh thuai bawk. Inelna neih meka goal thun tam ber ni mek Nick Woltemade chuan minute 14-naah an goal hnihna a thun zui leh zat a, an hmahruaina a tizau. Woltemade hian goal ruk a thun tling tawh a, Golden Boot dawng turin a dinhmun a tha hle. Goal an thun tluan em vangin England tan Woltemade hi ven uluk a ngai hle ngei ang. Minute 14 chhunga goal hnih a luh hman laiin goal dang a luh belh thei lo vang vang thun. Hun pangngaiah goal a luh belh theih loh hnu, hun pek belh minute 90+3-ah Brajan Gruda chuan Germany goal thumna a thun zui leh cheu a, Francce lakah nuamsa taka hnehna changin final an lut zui ta a ni.
Under 21 Euro final hi inrinni zanah khelh a ni dawn a. Champion lai England in Germany an hmachhawn dawn a, inkhel hmuhnawm tak a nih ngei a rinawm.
England leh Germany in final an lut
