England midfielder hlui Lallana chawl ve ta
Player ni chunga a season hnuhnung ber hmang turin Southampton-ah a kir a, vawi nga chiah luh hmasak changin, season liamta khan Championship lama Saints chhuk thla tur a chhan zo lo a, kum 37 mi niin Adam Lallana chuan football khela eizawn a bansan thu a puang ve ta.
Ram tana match 34 khel tling England midfielder hlui hian professional football a chawlhsan rualin coaching lam a vuan nghal dawn a, St Mary’s-ah tho boss thar Will Still-a hnuaia coach pakhat a ni chhunzawm nghal.
Lallana hi kum 2014 khan Liverpool chuan Southampton atangin pound maktaduai 25-in an senglut a, Anfield club-a a khelh chhung hian Premier League leh Champions League-ah a champion hman ve ve!
Champions League title a lak kum hi 2019 niin, a kumlehah Liverpool chu league title lakpui lehin, chu mi hnuah Brighton a zawm a, nikum khan a chawrchhuahna St Mary’s-ah a kirleh ta a ni.
Southampton academy atanga inzirchhuak Lallana hian kum 2006 khan rawlthar kum 18 mi lek ni chungin first team-ah a khel tan a, tum hnih zawma Saints a zawm chhungin match 300 dawn a khel tling a, League One atanga Premier League an kai thlengin squad-ah a tel kim vek!
Anfield pana a chhuah meuh kha chuan Lallana kha Southampton a ni hman tawh a, England tan 2014 World Cup a khel bawk.
England midfielder hlui Lallana chawl ve ta
