Euro 2024 qualifiers-a Malta leh North Macedonia hmachhawn tur England squad puan tawh atangin Real Madrid a zawm phat atanga Spain rama vul nghal char char Jude Bellingham chu hliam avangin a inhnukdawk.
English midfielder Bellingham hian karliamta Inrinni La Liga inkhel pakhata a khelhna club-in Valencia an hnehna game pawh kha a khel thei lo a, club lama a chetthat mar tluan vanglai takin national duty tura a chhuah a rem lo.
Bellingham rual hian Chelsea defen-der Levi Colwill pawh dar hliam avangin squad atang hian a inhnukdawk ve bawk a, ti hian, Gareth Southgate-a squad hmasa atangin player panga an rem dawn ta lo phawt a ni.
Thawhtanni khan Cole Palmer, Ezri Konsa leh Rico Lewis-te chu inhliam James Maddison, Callum Wilson leh Lewis Dunk-te hmunruak luahkhat tura sengluh thar an ni a; Bellingham leh Colwill-te kalbo ve leh hnu hian manager Southgate chuan an aiawhtu tur ruat a tum loh thu a tichiang.
Hetih lai hian hliam pui pui ni lo, mimal harsatna neuh neuh avangin Manchester United forward Marcus Rashford leh Manchester City midfielder Kalvin Phillips-te dinhmun pawh a la chiang zan bik lo a, kartawp lam hian squad nen an chungchang sawi turin an inhmu phawt ang.
Three Lions hian Zirtawpniah Malta mikhualin, karleh Thawhtanniah North Macedonia an luhkhung thung ang.
England hi nakkum European Championship khel tura tling tawh ni mah se Germany ram tournament-a top seed pakhat ni turin Group C champion nih hlen mamawh an la ni a, chumi tur chuan khelh hnih an la neihah hian vawikhat chak mamawh an la nih ve avangin team enchhinna ang leka a kalpui chu manager Southgate tan la rem rih lo tura ngaih a ni, a bikin, Wembley game-ah hian.
Tuntum hian England senior squad-a koh la ni ngai lo pathum – Chelsea forward Cole Palmer, Manchester City defender Rico Lewis leh Aston Villa defender Ezri Konsa-te chu thlan zingah telin, Palmer leh Lewis-te hi Under-21 atangin senior squad-ah an lut chho a; Pathiannia a club hlui City lama penalty atanga goal chhuihluttu Palmer hi club lama a chetthat rah sengtu pakhat a ni.
Kum 2017 Under-20s World Cup-a England champion-puitu zinga mi Konsa pawh hi Unai Emery team tan Premier League lamah ropui takin a inlan kal mek a, Englanf senior team manager kohna duhawm a dawng.
England squad
Goalkeepers: Sam Johnstone (Crystal Palace), Jordan Pickford (Everton), Aaron Ramsdale (Arsenal).
Defenders: Rico Lewis (Manchester City), Marc Guehi (Crystal Palace), Harry Maguire (Manchester United), Fikayi Tomori (AC Milan), Kieran Trippier (Newcastle), Kyle Walker (Manchester City), Ezri Konsa ( Aston Villa)
Midfielders: Trent Alexander-Arnold (Liverpool), (Real Madrid), Conor Gallagher (Chelsea), Jordan Henderson (Al-Ettifaq), Kalvin Phillips (Manchester City), Declan Rice (Arsenal).
Forwards: Jarrod Bowen (West Ham), Phil Foden (Manchester City), Jack Grealish (Manchester City), Harry Kane (Bayern Munich), Cole Palmer (Chelsea), Bukayo Saka (Arsenal), Marcus Rashford (Manchester United), Ollie Watkins (Aston Villa)