Entreprenuer tha ni tura hmeichhiate
chherna tur – WEP Mizoramah hawng
NITI Aayog State Support Mission hmalakna hnuaiah Women Led Development through Entreprenuership workshop chu Ningani khan Mizoram University-ah neih a ni. Hmanpuitu chief minister Lalduhoma chu Women Entreprenuership Platform (WEP) Mizoram Chapter a hawng.
Chief minister chuan India hmarchhaka NITI WEP chapter bultanna atana Mizoram an thlan avangin NITI Aayog thuneitute chungah lawmthu a sawi a. A hlawhtlin theihnan a tir atanga engkim buaipuitu LESDE minister Lalnghinglova Hmar chungah lawmthu a sawi bawk.
Mizoram economy-ah hmeichhiaten an thawhhlawk hle a, theihna pawh an nei a, hmasawn zelna tur remchang a tam tih sawiin, “Sawrkarin thalai, entreprenuer tha tan Bana Kaih Scheme a kalpui tan a. Tunah hian pilot phase-ah progress partner 517 thawhpui turin an thlang tawh a, an zinga 140 (27%) chu hmeichhia an ni,” a ti.
He scheme hi hmeichhia tam zawkten an chhawr zel an beisei tih chief minister hian a sawi a. NITI Aayog nen Bana Kaih leh scheme dangah thawk ho turin an inpeih reng tih sawiin, NITI workshop hi hmeichhiate tichak tura policy duanna leh NITI Aayog nena an thawhdunnaah a tangkai hle a ring tih a sawi a ni.
Hmanpuitu dang, NITI Aayog member Dr VK Paul chuan Mizorama hmeichhia mahni kea ding a, sumdawnna kalpuiten Women Entreprenuership Platform hi an tangkaipui ngei ngei dawn tih sawiin, a tam thei ang ber WEP-ah hian inziaklut turin an duh tih a sawi. Hmeichhiate tih hmasawn chu India ramin ram changkang a thlen theihna tura tihmakmawh a nih avangin Prime minister-in a ngaipawimawh a, NITI Aayog-in nasa takin a bawhzui tih a sawi a ni.
Chief minister-in a hawn tak WEP hmalakna hrang hrang chu – WEP State Chapter Mizoram, Yashasvani Program with M/o MSME, Swavalambini Program with MSDE, WEP Award to Reward programme with New Shop, WEP App Launch Beta Version, Awards to Women Entreprenuers by MAKE MY TRIP a ni.
Entreprenuer tha ni tura hmeichhiate chherna tur – WEP Mizoramah hawng
