Dutch football-a inkhel ngaihven hlawh ber ni kumkhua, team inhal kumhlun pahnih inkhel hi englai pawhin ‘classic’ tih a ni tawp a, Netherlands club ropui pahnih inhmachhawn hi ‘De Klassieker’ tih niin, Pathianni khan Ajax mualah an intum a, mikhual Feyenoord lamin sithum faia hma an hruai laiin home supporter lamin khelmual chhungah halmawi leh halpuah an vawmluh avangin second half minute 56-ah inkhel tihtawp a ni a, vawiin hian entu awm loin an khelh hmabak hi zawh fel tur a nih thu Dutch FA (KNVB) chuan a puang.
Johan Cruyff Arena-a Eredivisie match-ah khan Feyenoord lamin 2-0-a hma an hruai lai pawhin Ajax fans thinrimin khelmualah plastic cup an vawmlut a, inkhel tihtawp zawk a lo ni tawh a, mikhual lamin goal khat dang an thunbelh leh hnuah mipui lungawi lo thawm leh chetna a na sauh a; inkhel tihtawp a nih hnuah pawh buaina chhuak zui zelin, stadium pawn lama mipui thunun turin police-te’n tear gas an hmang hial a; Amsterdam police thuchhuah chuan home supporter thenkhatin khelmuala luh luih an tum niin an sawi.
Feyenoord player leh staff-te chu hun engngemawchen dressing room lamah awmtir niin, thuneitute’n a him an tih hnuah chhuahtir chauh an ni a; team pahnih inkhel boruak a san thin em avangin Pathianni inkhelah khan Feyenoord lamin fans an hruai lo mah mah!
Ajax coach Maurice Steijn chuan thil thleng pawi a tih thu sawiin, club thuchhuah pawhin season bul an tan fuh theih loh mah tih tawh laia harsatna dang an tawk zui leh chu pawmzam theih a nih loh thu sawi chungin kha thil thlenga hlauhlawpa awm leh him loa inngaite zawng zawng chungah thupha an chawi!
|um 36 tehreng Dutch champion ni tawh Ajax hi tun season league an khelh zawh tawh vawiliah vawikhat chiah la chakin, table-ah 13-na an luah a, point hnih chiahin tlakhniam theihna hmun an kalsan!
Pathiannia an home game pawh kha khel tluan se tlawm leh ngei tura ngaih ngheh niin, Santiago Gimenez chuan Feyenoord tan goal hnih a thun a, Igor Paixao chuan mikhual goal thumna thawh ve lehin, kha khan home supporters thinrimna a tizualkai ta a ni.
Feyenoord boss Arne Slot chuan an chak ngeina tur nia lang inkhel an zo thei lo a ui thu sawi chungin an chance tha lutuk lakbosak an nih thu a sawi a, chutih rualin thuneitute thutlukna siam an hriatthiam thu leh him taka bus an lut thei lawmawm a tih thu a sawi.
Referee Serdar Gozubuyuk khan minute 56-ah player-te chu khelmual chhuahsan turin a hriattir a, inkhel tihtawp zui nghal a ni.
Ruahman lawk ang chuan vawiin hian Dutch top flight-ah Ajax Amsterdam leh FC Volendam inhma-chhawn zui leh tur niin, Feyenoord nena chinfel tur an neih leh tak si avangin he match hi sawnhlat a ni.
Entu awm loa khelh zawh tur Ajax vs Feyenoord
