Nimin kha World Environment Day a ni a, Mizoramah pawh district thenkhatah hman a ni a. Mizoram Pollution Control Board leh Mizoram EIACP Hub tangkawp chuan he ni pual hian Aizawl bâkah district khawpui dang zawng zawngah a rualin environment humhim tura inzirtirna beihpui an thlâk a. Gauhati High Court Aizawl Bench chuan, AR chhuahsan ram cheibawlna kal meka thing kih tur ruahman chungchang a relna Order nimin khan a tichhuak a. A tira thing kih tur 170 ruahman atangin thing 23 chauh kih phal a ni ta a; Gauhati High Court Aizawl Bench hian environment humhalhna Order hmangin World Environment Day hi a hmang a tih theih bawk awm e.
Kan hma lawk June 11 khian Green Mizoram Day hman a ni dawn bawk a; GMD pawh hi environment kaihhnawih bawk a ni. Mizoram hian environment hi kan ngai pawimawh viau niin a lang a, Green Mizoram Day-ah ringawt pawh hian tha leh zung, sum leh pai kan seng nasa tawh viau mai. Chutih ruala rilrua riak reng thin chu, “kan sawi thin a, kan sawi nawn leh ang” tih ang deuh khan, environment humhalh kawnga hmalakna kalh zawnga ‘shifting cultivation’ kan la kalpui tluk tluk reng mai hi chu a inhmeh lo mai pawh ni lovin, ‘mahni lu chunga meiling chhek khawl ang’ kan ni deuh ber awm e. India ramah ‘ram hring’ (forest land) ngah ber state kan nih rualin, ram hring tichereu chak ber kan ni nghal bawk. Hengte hi lak serious a hun tawh hle a ni.
World Environment Day hi United Nations Environment Programme (UNEP) hnuaiah kum 1973 atanga hman tan kha a ni a, kum 53 zet liam ta atang tawh khan khawvel chuan environment humhalh a pawimawhzia an lo hre tawh a, an lo vei daih tawh.
Kum 1973-a Mizoram dinhmun kha han ngaihtuah ila, sik leh sa kalphung a la pangngai a, ramhnuaiah kawrte tui fim vawt tak hmuh tur a la tam a, world environment day tih vel chu kan la hmelhriat lo viau awm e.
Kum 53 a han ral leh meuh chuan, kawrte tui fim hmuh tur a awm tawh lova, thlasik a sik tawh lova, ruahin sur hunbi a nei thei tawh hek lo. ‘Kumin chu a va lum e’ kan ti kum tin tawh a. Ruahtui bihrukna ramngaw kan tihchereu nasat avangin tuihna a kang a, thalah lui tui a kang a, tui lamah harsatna kan tawk mek a nih hi.
Environment kan tihchhiat hian environment hi a phunnawi hran lo, mahse signal erawh min pe zel. Tuna Mizoramin environment atanga signal kan hmuh mek hi kan ngaihthah reng chuan, kum 53 lo awm leh tura Mizoram dinhmun tur chu tuna kan dinhmun let tam taka chhe zawk hi a dawn tih a chiang a ni.
Environment leh Mizoram
