Sawrkar thuchhuahin a tarlan danin, Elector Photo Identity Card (EPIC) neite chuan vote an thlak hmain polling station-ah an identity tichiang turin EPIC an hmang tur a ni a; eng emaw avanga EPIC nei lo tan a aiah thil dang chi 11 a hman theih, tih a ni a. Chungte chu – Aadhaar Card, MNREGA Job Card, Bank/Post Office Passbooks (thlalak chuanna); Ministry of Labour hnuaia Health Insurance Smart Card; Driving License; PAN Card; National Population Register hnuaia Registrar General & Census Commissioner, India (RGI) in smart card a pek chhuah; Indian Passport; Thlalak chuanna Pension document; Central/State Govt./PSUs Public Limited Companies ten an hnuaia thawkte hnenah Identity card an pek chhuah (thlalak chuanna); MPs/MLAs/MLCs te hnena official identity card pek chhuah leh, Ministry of Social Justice & Empowerment, Government of India-in Unique Disability ID (UDID) Card a pek chhuah.
Vote thlak duh si, mahse EPIC a remchan rih loh avanga ‘vote ka thlak ta lo mai’ tia chhuanlam han siam dawn pawha chhuanlam siam theih miah lohna turin sawrkar chuan zau takin kawng a hawng a ni ber a. Heti chung pawha vote la thlak duh lo hramte chu khua leh tui tha leh tangkai an ni dawn lo tihna a ni awm e. Vote thlak duh loh hi, ram pakhata khua leh tui ni ve lem, ram leh hnam tana tha thawh tum miah lo leh mawhphurhna lak tum miah lo anga ngaih theih a ni a, mahni inhlut nachang hriatlohnaah a ngaih theih a ni a, chu chu a hniam hle a ni.
Kan hma lawkah Lok Sabha MP kan inthlang leh dawn a ni a, India ram rorelna sang bera Mizoram mipui aiawha roreltu tur a nih avangin a pawimawh hle a. Candidate-ten Mizoram thatna tura hmalak an tum dan an sawite ngunthluk taka ngaihthlak a, lo buk tawn a, mahnia ngaih dan siam ve thei tura chik taka lo bengkhawn hi khua leh tui tha tihtur (duty) a ni. Uluk taka ram hruaitu tur kan thlan phawt chuan, Chunglam pawhin mal a sawm ngeiin a rinawm. Vote thlak a pawimawhzia hriain sawrkar pawhin mipui tan zau takin remchanna a hawng a ni a, kum nga dana ram tana nikhat tal hun pek hi ui lova nghakhlel zawk tur kan ni. Tihtakzetna nen inthlan hmachhawn turin mipui inbuatsaih sauh sauh ang u.
EPIC tel lova vote thlak…
![](https://theaizawlpost.org/wp-content/uploads/tap_logo-min-large.jpg)