EPIP Lengte tichangtlung dawn
Commerce & Industries department, Land Revenue & Settlement department, Public Works department leh Power & Electricity department hotute chuan Industries minister F Rodingliana hoin Zirtawpni khan Export Promotion & Industrial Park (EPIP) Lengte an tlawh a, industrial area tih changtlunna tura hmalakna kal mek an endik.
Khawl hmanga a hmunhma zirchianna, geographic information system (GIS) mapping leh a ramri tehfel (re-plotting) hna kalpui zawh tak zulzuia industry hrang hrang rem (allocate) dan tur ruahmanna enho nghal a ni.
EPIP Lengte hi industry dinna turin kum 2003 khan ruahman a ni a. Industrial Park siamna tur hian mimal ram 155 lak (acquire) niin, a zau zawng hi bigha 1390.22 a ni.
Minister hoa endiknaa sawi danin, industry dinna tura ram lak fel tawh chhungah mi thenkhatin hmun engemawzat an la enkawl zui a. Mizorama industry tih hmasawnna atana ruahmanna awmte sawt zawka kalpui a nih theihnan dan loa ram la enkawl zui lui chu an pass rang taka cancel a tul tih an sawiho.
EPIP Lengte chhunga ruahmanna felfai kalpui a nih theihnan industry-te thil siamchhuah azirin a hlawma an awm zel theihnan PWD chief architech enpuina in GIS mapping leh re-plotting hna zawh fel tawh pawh C&I minister ho hian a taka kalpui dan tur an enho nghal bawk.
Minister hian 132 kV Sihhmui Sub-Station atanga EPIP Lengte chhunga industrial unit, a bik taka power supply pekna tur en nghalin, EPIP Lengte chhunga kawlphetha thlun dan mumal taka siam leh a tih changtlun zelna tura hmun awl zuah a pawimawh tih sawi a ni.
EPIP Lengte tichangtlung dawn
