Mizo ten tualchung league kan ngainat leh kan en nasat ber English Premier League season thar tan a hnai a. EPL 2023-24 season chu August 11, Zirtawp zanah khelh tan a ni dawn a, season tharah inkhel hmasa berah Burnley in champion lai Manchester City an mikhual ang. Spost site lar tak pakhat Goal.com chuan EPL 2023-24-a chetha tura an rin an tarlang a. Manchester United chu champion tura an rin ber an ni a. Chelsea leh Tottenham ten top 4 huang an luah phak leh dawn lo. Goal in EPL 2023-24-a chetha zual tura an ngaihte kan tarlang ang.
1. Manchester City
Season liam taa treble champion hial ni thei Manchester City hian an player pawimawh midfielder Ilkay Gundogan leh winger Riyad Mahrez ten an chhuahsan tawh a. Joao Cancelo, Aymeric Laporte leh Kyle Walker te chhuak thei dinhmunah an ding mek bawk. An player pawimawh tak tak an chhuah laiin player pahnih chauh an la lut thung a. An lak luhte chi Croatia international ve ve midfielder Mateo Kovacic leh defender Josko Gvardiol te an ni. Player lak luh ngah lo mah se an lak chhunte erawh player tha, an mamawh chhanna ni theite an ni thung.
City hian EPL-a a season khatnaah season khat chhunga goal thun hnem ber record siam nghal hial Erling Haaland an nei miau a, playermaker tha ber ang hiala ngaih Kevin de Bruyne an neih bakah holding midfielder chetha em em mai Rodri an nei cheu bawk a. Tlarhnung player an neih that tawh sa nak laiin Gvardiol an neih belh leh cheu a, inelna apiangah an khingpuite tan khingpui nem an ni thei dawn lo hrim hrim. Manager an nei tha a, an squad a chhah tha bawk si a, City bawk hi EPL champion tura rin ber an ni.
2. Arsenal
London club lian Arsenal hian season liam ta khan EPL-ah ni 248 chhung zet hma an hruai a, season tawp lamah an chet fuh loh vangin an champion zo lo. Champion zo lo zingah hmahruai rei ber record an siam. Uiawm taka an champion zo lo hi an la na em em a, season tharah chetsual nawn an tum tawh lo. Chetsual an tum tawh loh vangin nipui bazar laiin an mamawh player lak tur an zawng a, player pathum an la lut tawh. West Ham atangin England midfielder Declan Rice chu British player manto ber ni turin an la lut a. Germany forward Kai Havertz chu chu Chelsea atangin an la lut a, Ajax atangin Netherlands defender Jurrien Timber an la lut bawk.
Goal.com chuan season hmasa ang thoin Arsenal hi an chet that zui leh an ring a, City hmakhalha champion tur em chuan an ring zo lo thung.
3. Liverpool
Liverpool hian season liam taan beisei an phak lova, top 4 huang an luah phak lo. Season tharah erawh an chetha chho tura ngaih an ni. Reds hi player pawimawh Fabinho, Jordan Henderson leh Naby Keita ten an chhuahsan a. Khawng zawka inlan turin Dominik Szoboszlai leh Alexis Mac Allister an la lut tawh a, Luis Diaz a dam tawh bawk. An forward pawimawh Mohamed Salah chu Saudi Pro-League club ten hlawh tam uchuak tak hlawh turin sawm bawk mah se Anfield-a cham chhunzawm a thlang a. Top four huang luah let leh turin Reds tan Salah hian a thawhhlawk zui leh viau tura ngaih a ni.
Liverpool hian season hmasa ai chuan hma an sawn ngei tura ngaih a ni a, pathumna an nih rin a ni.
4. Manchester United
EPL club ropui Manchester United hian Erik ten Hag hnuaiah hma an sawn a, season liam ta khan Carabao Cup-ah an champion nawlh a, kum ruk chhung trophy lak nei lova an hawihil lai an titawp. Carabao Cup-ah an champion bakah FA Cup-ah final an lut bawk. Season tawp lamah an chetha a, EPL-ah pathumna an ni hial bawk. Season liam taah an awmna aia hniam hrer palinaah an awm rin a ni.
United hian Chelsea atangin Mason Mount an la lut a, Inter Milan goalkeeper Andre Onana an lak bakah forward tha chho tak Rasmus Hojlund an la lut bawk. United hi team khawng tak an ni reng thin a, season hma aiin an tlahniam hret tura ngaih a ni thung.
5. Chelsea
Nipui bazar leh thlasik bazar laiin sum seng hnem viau mah se season liam ta khan Chelsea hi EPL-ah an che chhe viau a, EPL hming a put hnua an chet chhiat ber tum a ni hial nghe nghe. Season tharah tha zawka inlan turin an inbuatsaih nasa leh viau a, EPL a tawnhriat nghah tak Mouricio Pochettino chu an manager tharah an la lut a. Havertz leh Mount chhuak bawk mah se Christopher Nkunku, Nicolas Jackson leh France defender Axel Disasi te an la lut tawh a. Brighton atangin Moises Caicedo an lak theih hmel viau bawk. Blues hian season tharah hma an sawn tura ngaih a ni a, pangana an nih phak rin a ni.
Goal.com in an rin danin season liam taah palina nia champions league khel tur Newcastle chu parukna an nih a ring a. London club lian Tottenham chu pasarihna an nih a ring bawk. Kai thar Burnley an him teih an rin laiin AFC Bournemouth bakah kai thar pahnih Sheffield United leh Luton Town te championship lamah an tlakhniam an ring. Inrinsiak hun lai a ni a, zirtawp zan atangin a tak hmuh tur a awm ang
EPL 2023-24 champion tura rinkai Manchester City
