Khawvela tualchhung league lian leh ropui ber English Premier League (EPL) season thar tan a hnai a. EPL 2026-27 season-ah tu nge champion ang a, tute nge chetha ang tih chu football ngainatute zawhna leh hriat chak a ni. Tun tumah hian BBC a Chief football writer – Phil McNulty-a’n EPL 2026-27 a thlirlawk; Table-a an indawr dan tur angin kan tarlang ang.
1) Arsenal
‘Next Season’ thlir a, ‘Teuhsenal’ ni reng thin kha season liam ta khan an champion ta nge nge a, ‘Taksenal / Champsenal’ an ni ve ta. EPL-ah kum 22 hnua a vawi khat nan an champion hnuin Arsenal hian inrintawkna sang zawk an nei ngei dawn a. Manager ngai Mikel Arteta-a’n a enkawl chhunzawm dawn bawk vangin champion leh theihna hun tha tak a nei.
Arsenal hian an player thenkhat an hralhchhuak ngei tak naa player pawimawh, an mamawh lai ngawih ngawih ch^n an nei lo. An squad thuamchak turin midfielder Bruno Guimaraes an la lut a, winger Christos Tzolis an la lut tawh bawk. An player thar pahnihte hi Community Shield-ah an chhawr tangkai nghal viau a, hei hi season tharah Arsenal squad a chhah leh zual dawn tih tifiahtu a ni.
Gunners hian Community Shield-ah an elpui lian Manchester City chu 3-0 ngawtin an sawp. Hei hian EPL-ah champion nawn tura Arsenal an that tawkzia a tilang chiang viau a ngaih a ni.
EPL club lian dang Manchester City, Liverpool leh Chelsea ten manager thar an nei hlawm. Team lian pathumte hi manager thar hnuaia chona thar hmachhawn tur an nih laiin Arsenal erawh chu EPL-a champion puitu Mikel Arteta-a’n a enkawl chhunzawm dawn thung a, hei hi Arsenal tan champion nawn leh theih nana kawng hau zualtu a ni thei dawn bawk.
2. Manchester City
Manchester City hi season liam ta khan EPL-ah pahnihna an ni a, season tharah pawh pahnihna an ni chhungzawm leh tura ngaih an ni.
Manager ropui Pep Guardiola chuan kum 10 zet a enkawl hnuin City a chhuhsan. Manager tha leh fing tak Guardiola a chhuah bakah an player pawimawh tak tak Rodri, Bernardo Silva leh John Stones te an chhuak tel bawk. Manager Guardiola hmunruak luah zawh a har em em dawn a, midfielder ropui Rodri hmunruak luah zo hmuh a leh zual dawn. City hian Nottingham Forrest leh England tana chetha thei tak Elliot Anderson an lak luh bakah Rodri hmun ruak luah turin Morocco rawlthar Ayyoub Bouaddi an dawr mek bawk. Bouaddi an la lut thei a nih chuan Rodri hmun ruak zau lutuk a ziaawm theih deuh an beisei.
Manchester City hian manager thar Enzo Maresca kaihruaina in chona thar an hmachhawn a, season thara an chetla hmuh a chakawm tawh hle. Manager thar hnuaiah beisei lawk aiin an chetha thei a, rinphak bakin an talbuai ve thut thei tho bawk. Erling Haaland an nei a, goal thun lamah erawh an hnufum kher lo ang.
3. Liverpool
Jurgen Klopp thlaktu Arne Slot hnuaiah beisei phak lo takin season an hmang liam a, EPL-ah pangana an ni. Season liam taah pangana ni bawk mah se season tharah erawh hmasawn leh zual tura ngaih an ni a, pathumna an nih rin a ni. Pathumna an ni ta chiah lo a nih pawhin Reds hian top 4 huang erawh an luah ngei tura ngaih a ni thung.
Liverpool hian Manchester City ang thoin manager thar an nei a, AFC Bournemouth manager Andoni Iraola an ruai. Iraola hian Bournemouth a kaihhruai danah manager tha a nihzia a lantir chiang viau a, Arne Slot thlak zo hle tura ngaih a ni. Bournemouth a enkawl anga thaa Liverpool hi a enkawl zui thei a nih chuan EPL leh champions league-ah a champion pui nawlh a nih pawhin a mak lo ang.
Liverpool chanchina player ropui ber zinga mi Mohamed Salah chu Anfield atangin a inpuchhuak a, Salah hmunruak hnawhkhah hi a awlai dawn hauh lo. Chutihlai chuan Reds hian player tha tak tak an kawl nual a, PSG atanga Bradley Barcola an la lut thei a nih chuan an tlarhmate an hlauhawm leh zual viau tura ngaih a ni.
4. Chelsea
London club lian Chelsea hian EPL 2025-26-ah team lian zinga talbuai nasa ber pawl an ni a, 10-na daih ni chungin season an khar. An chetchhiat em vangin season tharah European competition an khel phak dawn lo. European competition khel phak dawn lo mah se manager thar Xabi Alonson hnuaiah hma an sawn thar viau tura ngaih an ni a, season tharah palina ni thei tura ngaih a ni.
Xabi Alonso hian Bayer Leverkusen-ah manager tha a nihzia a lo lantir tawh a, Chelsea-ah thuneihna sang zawk neiin a lut a, Blues chetthatpui turin a inringtawk hle. Chelsea hian manto takin Morgan Rogers an la lut a, Crystal Palace atangin France defender Maxence Lacroix an la lut tawh bawk. Anni bakah hian tawnhriat nghah pahnih; Jordan Henderson leh Danny Welbeck te an la lut bawk. An squad an thuamchak lai mek hian an midfielder pawimawh Enzo Fernandez ch^n thei dinhmunah an ding thung.
5) Manchester United
Boruak nei lian leh tantu pawh ngah tak Manchester United hi season liam ta khan Reuben Amorim hnuaiah an talbuai hman viau. Amorim an ban hnuin Michael Carrick chu manager lailawk ni turin an la lut. Carrick hnuaiah United an vul chho a, pathumna hial niin a tawp an khar tha hle. Carrick hian manager nghet niin enkawl zui dawn bawk mah se pathumna atanga panganaa tlahniam tura ngaih an ni tlat thung.
Red Devils hian Aston Villa atangin Belgium midfielder Youri Tielemans an la lut a, Chelsea atangin Andrey Santos an la lut bawk. Phil McNulty chuan United hi champions league an khel phak thut a nih pawhin EPL-ah champion theihna chance nei lo tawpah a ngai.
6. Aston Villa
Manager tawnhriat ngah Unai Emery hnuaiah Aston Villa hi season liam ta khan an chetha viau a, EPL-ah palina an nih bakah Europa League-ah an champion hial nghe nghe. Season liam taah palina lai ni bawk mah se season tharah erawh chuan parukna ni tura ngaih a ni.
Nipui bazar inhawng mekah Aston Villa hian an player pawimawh pahnih; Morgan Rodgers leh Youri Tielemans te an ch^n tawh. An player pawimawh pahnih tel lo hi chuan an tan chet a har phah ve viau dawn. An player hrawl pahnih an ch^n lai hian Alejandro Garnacho chu loan in an hawh a, Wolves atangin Brazil midfielder Joao Gomes an la lut a. World Cup-ah Switzerland tan mit la taka inlan Johan Manzambi an lak tawh bakah Japan si nghak Zion Suzuki la lutin an squad an thuam chak tawh thung.
7. Tottenham Hotspur
London hmar Veng club lian Tottenham hi season liam ta khan team liam zingah EPL a talbuai nasa ber an ni a, 17-na niin tlakhniam an pumpelh hram chauh. Season liam taah che chhe viau mah se season tharah erawh hmasawn dawrh tura ngaih an ni a, pa 7-na ni thei tura ngaih an ni.
Tottenham hian an squad thuamchak hna an thawh laiin an player tha an ch^n ve zel bawk a, an lut chhuak zut a ni rih ber mai. Andrew Robertson leh Marcos Senesi te la lutin an phur viau a, tum tam tak sengin Sandro Tonali an lak luh bakah Mateus Fernandes leh Jan Paul van Hecke an la lut bawk. Hetihlai hian an captain Cristian Romero chu Atletico Madrid in an la a, England defender Djed Spence pawh Italian champion Inter Milan in an la bawk.
BBC Chief football writer – Phil McNulty hian Nottingham Forrest chu chetha chhunzawm thei turah a ngai a. Robinhood-a te khua hi pariatna niin Europa Conference League khel phak turah a ngai. Nottingham Forrest hnuaiah hian Brighton and Hove Albion, Brentford, Crystal Palace, Newcastle United, Everton, AFC Bournemouth, Leeds United, Fulham leh Sunderland te an indawt thlak a ring.
Phil McNulty-a’n EPL 2026-27 a thlirlawkna kan tarlan atang hian langchiang nghal pa khat a awm a, chu chu EPL a kaisang thar pathum; Coventry City, Ipswich Town leh Hull City te inhamtang zo lovin an tla leh nghal dial turah a ngai hi a ni.
Heng club pathumte hi season liam ta khan championship lamah an chetha hlawm a, khawvela tualchhung league-a sum tamna ber English Premier League khel turin an tling. EPL-ah inhamtang turin theihtawp an chhuah zui ngei dawn a ni.
EPL Champion tura rinkai ber Asenal
