Pathianni zana English Premier League khelhah Arsenal chuan an mikhual Brighton & Hove Albion chu si hnih faiin an hneh. An mualah Arsenal an chak laiin Liverpool chu an mikhual Manchester United nen goal awm lovin an inhnehtawk ve thung. Liverpool an chak zawh loh vangin table-ah hmahruaitu an inthlakthleng a, Arsenal chu hmahruaitu thar an ni.
Gunners in Brighton an hneh ve ta
Emirates Stadium-ah ngei vawi hnih an hneh loh zawn tawh Brighton lakah Arsenal an chak ve ta nge nge. Arsenal mualah vawi thum chak zawn tum Brighton hian shot on target vawi khat chiah an nei a, chak an hnaih lo hle. Ball chang tam leh hlauhawm zawk ni reng mah se Mikel Arteta team in goal an thun thei lawk bik lova, chawlhlawk hmain goal an thun thei lo phawt.
Chawlhlawk hmain goal thun thei lo mah se, chawlhlawk hnu lamah goal a thun thuai a, Laipui a puak ta thuai. Minute 53-naah Bukayo Saka coner pet chu Brighton defender in a tauh per chu Gabriel Jesus chuan hnaite atangin a tauh goal a, hmahruaina goal a thun. An hun tha neih an hlah tlut tlut hnua goal an thun vangin Arsenal an thaw huai a, an khel tha chhunzawm viau bawk. Gunners hian fuh zeta an nawr tlang hnuin captain Martin Ødegaard a pet goal lova, uiawm takin a hun tha a hlah.
Arsenal hian goal thun belh thei lawk lo mah se hun tawp dawnah an che fuh a, goal an thun leh ta nge nge. Fuh zeta an mikhualte an nawr tlang a, chiang zeta Brighton tlarhnung an thiah hnuin Kai Havertz chuan Eddie Nketiah siamsak tha tak chu awlsam takin a pet goal a, an goal hnihna a thun. Havertz goal thun hnuin goal dang a luh belh thei tawh lova, Arsenal chuan an mualah si hnih faiin hnehna an chang zui ta a ni.
An mualah an chak vangin Arsenal hian khelh 17 atangin point 39 an hmu a, table lerah an kir leh. Arsenal hian an hnuai chiaha awm Liverpool an hmachhawn zui leh dawn a, hmahruai chhunzawm turin fiahna hautak an paltlang a ngai dawn. Si hnih faia an hneh tak Brighton khan khelh 17 atanga point 26 hmuin 9-naah an luah ve thung.
Liverpool an chak zo lo
Anfield-ah English club zinga inhal ber Liverpool leh Manchester United an inhma-chhawn a. Ball chang tam zawk leh hlauhawm zawk ni tluan chungin Liverpool chu an mualah an chak zo lo. An mual-ah an chak zawh loh vangin Reds hian an hmahruaina an hloh zui nghal bawk.
Liverpool hian tunhnaiah Manchester United an ngam viau a, Anfield-a an intum hnuhnung vawi hnihah chak zawnin goal 11 zet an thun a, United lakah goal an chhuah miah lo nghe nghe. Thla kaw lian ta maiah 7-0 ngawta an sawp theih an nih vangin Reds hian Red Devils an hneh nawn leh ngei tura ngaih a ni a. EPL leh Champions League-ah an chak loh zawn lai a nih vangin United in Liverpool lakah point an hlawhchhuah theih rin a har viau.
Rinlawk ang ngeiin Liverpool in an mualah an khel tha a, ball an chan tam bakah shot an nei fo va, an mikhualte an tihlauthawng thei hle. United a zawm hnua beisei phak lo si nghak Andre Onana a chetha tehtlat a, a team tlawm tur a chhanhim a tih theih hial. Liverpool hian an mikhual United lakah 69% zet ball an chang a, shot vawi 34 zet nei bawk mah se goal an thun thei lo tluan a, an mualah uiawm takin an chak zo lo. Liverpool defender Virgil van Dijk chuan an mahni chiahin chak an tum a, United in chak an tum ngam lo niin a sawi a. “Point khat a hmuh vangin an lawm em em a, point hnih kan hloh vangin kei chu kan hnual viau thung” Van Dijk hian a ti bawk.
An mualah an chak zawh loh vangin Liverpool in Arsenal lakah an hmahruaina an hloh a, Gunners hi point khatin an phak lo mek. Reds lakah an chak zawh loh vangin United in hma lam an pan thei lova, pasarihnaah an awm chhunzawm. Season kal meka beisei phak lo United hian hmahruaitu Arsenal chu point 11 zetin thlau hial tawh.
EPL hmahruaitu thar Arsenal
