Inrinni zan khan EPL Season thara team chetha pahnih: West Ham United leh Brighton & Hove Albion an inhmachhawn a. Amex Stadium-a inkhel hmuhnawm takah West Ham in hnehna an chang a, EPL hmahruaitu thar an ni.
Amex Stadium a lenglut West Ham hian bul an tan tha viau a, minute 19-na lekah Southampton atanga an lak James Ward-Prowse chuan hnai tak atangin a pet goal a, hmahruaina goal a thun. A club thar tana Ward-Prowse goal thun hmangin Hammers hian chawlhlawk hmain hma an hruai a. Chawlhlawk hnu lamah goal hnih an thun belh leh.
Chelsea pawh lo hneh tawhtu West Ham hi chawlhlawk hnu lamah an khel tha chhunzawm a, minute 58-naah Jarrod Bowen chuan an goal hnihna thunin an hmahruaina a ti zau a. Bowen goal thun atanga minute nga hnu lekah Michail Antonio chuan an goal thumna a thun zui leh zat a, dinhmun tha zual zawkah an ding.
An mualah si thum fai ngawta an hnufual hnuin Brighton in an si phurh sut tumin tan an khawh a, an hlawhtling thei mai lo. Hun tawp dawn hnaih minute 81-naah Pascal Groß goal thun hmangin an si phurh an sut then naa point hlawhchhuak turin goal dang an thun belh thei tawh lo. An mikhual West Ham lakah an tlawm vangin Brighton in ELP chanchina hma an hruai vawi khatna chu tihtawpin a awm zui ta a ni.
Season thara khel tha Brighton lakah an chak vangin West Ham hian khelh thum atanga point sarih hmuin EPL hmahruaitu thar an ni a. Pathianni zanah Manchester City result a zirin Hammers dinhmun hi a danglam leh nghal thei thung.
Season tharah West Ham an khelh that tluan laiin Everton erawh an talbuai chhunzawm zel thung. Everton hi Goodison Park-a an mikhual Wolves lakah si khat faiin an tlawm a. EPL season thara an khelh hmasak pathumah an tlawm vek a, table mawngpha an luah nghet deuh deuh zel.
EPL hmahruaitu West Ham
