Inrinni zan khan khelmual ropui Wembley Stadium-ah Premier League khel tur zawnna hnuhnung Championship Play-off final khelh a ni a. Luton Town chuan penalty shoot-out ah 6-5 in Coventry City an hneh a, a vawikhat nan Premier League-ah an inlan dawn.
Football-ah match khat hlu ber ang hiala sawi thin championship play-off final-ah hian Luton Town leh Conventry City te an inhnehtawk viau a, hun pangngaiah goal khat ve ve an thun. He inkhel hmuhnawm takah hian Luton Town in bul an tan tha a, minute 23-na lekah Jordan Clark chuan Adebayo siamsak atangin hmahruaina goal a thun a, he goal hmang hian hun rei tak hma an hruai.
Goal an chhuah hnuin Coventry City in an si phurh sut ngei tumin tan an khawh a, minute 66-naah Gustavo Hamer chuan Gyökeres siamsak atanga goal thunin an si phurh a sut. 1-1 a an inhnehtawk hnuin goal thun belh thei an awm tawh lova, tie-break hmangin EPL-a kaisang tur zawn chhunzawm a ni.
Penalty shoot-out-ah hian petu 11 ten an pet goal vek laiin Coventry tana pet hnuhnung ber Fankaty Dabo chuan goal chungah a pet chhuak luah a, Luton Town chuan 6-5 a hnehna hlu tak an chang a, tualchhung league hlu leh sum tamna ber English Premier League khel turin an kaisang.
Championship play-off final-ah hian inkhel tirte-ah Luton captain Tom Lockyer chu nikhaw hre lovin a tlu a, damdawi in panpui nghal a ni. Boruak rit tak hnuaiah hnehna an chan hi an captain tan an hlan.
EPL khel tur Luton Town
