Eptuten candidate tura an sawm zingah ruling lam vauna awm thin

Eptuten candidate tura an sawm
zingah ruling lam vauna awm thin
Local council leh village council inthlan dawnah opposition lamin candidate tura an sawmte ruling party atangin anmahni emaw an chhungte sawrkar hnathawk emaw vauna anga ngaih theih a awm thin tih Congress hruaitu Dr Lalmalsawma chuan a sawi a. Kalphung thar an tihah hian mihring zalenna democracy palzutna a awm hiala ngaih theihin thil a thleng mek tih a sawi.
MPCC treasurer Dr Lalmalsawma Nghaka hian Aizawl veng hrang hrang – Venghnuai, Republic Veng, Dam Veng, Chaltlang leh Vaivakawna Congress party atanga local council member chuh tur a puang a. Local council/ village council chu ‘grassroot politics’ tak tak thleng pha, mipui nena inhne hnai ber an nih avangin an mawhphurna a sang hle tih a sawi.
“Vengchhung inrelbawlnaah mitin chungah intluktlanna leh rorelna rualkhai kan ramin a mamawh tawh hle a. A bikin, baihvai leh harsa zawkte dikna chanvo humhimtu kan LC leh VC member-te hi an nihna a pawimawh takzet a; Congress ticket-a VC/LC chuh mek kan candidate-ten rolrelna dik leh rualkhai kengkawh tura rilru paukhauh huaisen pu turin ka ngen a ni,” a ti.
VC/LC inthlan turah hmun hrang hrangah opposition lamin candidate tura an sawmten ruling atangin invauna titih an tawk thin nia sawiin, thleng tawh ngai lo se a ti hle tih MPCC hruaitu hian a sawi.
“Khawtlang tana mitha ni tura kan ngaih kan sawm zingah an chhungte, an nupui-pasal an fate, sawrkar hnathawk awmnaah ruling party lamin invauna anga ngaih theih thu an chhakchhuah hriat tur a thleng foa, kalphung thar an tihah hian mihring zalenna democracy palzutna a awm hiala ngaih theihin thil a thleng mek,” a ti.
Krimas/ kumthar vuakveta sawrkarin na taka halpuah leh halmawi hal a khap tih Congress treasurer hian sawiin, Congress sawrkar khan he thil hi a vei thin a nih avangin Congress president Pu Lal Thanzara pawhin Congress party mipuiin sawrkar ngenna thlawp turin a ti hial tih a sawi.
Hetihlai hian thu an hriat zel danah sawrkar khapna dan bawhchhiaa thubuai an siamsak ho kha a tam zawk chu mi harsa te te, dinhmun harsa zawk an ni zel nia sawiin, “ZPM sawrkarin drone-in thupek zawm lotute kan vai dawn an tihah khan, an drone khan mi hausa leh mi ropui, building sang tak tak atanga sawrkar dan bawhchhiate kha hmuh hmaih fai vekin, an zuam zawng veng hmawr deuha awm leh khawvel thila chhuan tur nei lo deuhte kha a hmu thei bik emawni tih turin thil a thleng an ti a. Kan ramah sawrkar tha mitin chunga inang khata rorel ngam leh mi harsa leh baihvai zawkte tan an dikna chanvo humhalh ngam kan mamawh zia a lang thar zual,” a ti.