Eptuten special session koh an phut na telh telh

Eptuten special session koh an phut na telh telh
Indian sipaiten Operation Sindoor an kalpui chungchang leh ram himna thil hrang hrang sawina tura eptuten Parliament special session koh an phutna chu a lian zel.
Eptu party 12 vel chuan inthuruala BJP kaihhruai NDA sorkar chu rorelna ina sawihona huaihawt ngei tura na zawka kar an tum.
Congress, Trinamool Congress (TMC), Samajwadi Party (SP), Dravida Munnetra Kazhagam (DMK), Aam Aadmi Party (AAP), Shiv Sena (UBT), Rashtriya Janata Dal (RJD), National Conference, Jharkhand Mukti Morcha (JMM), CPI-ML, Indian Union Muslim League (IUML) leh AIMIM te chuan special session koh ngei hi an phut.
Pahalgam-a firfiakte chetna thleng te, a hnua Operation Sindoor kalpui te, inkahhai puan mek chungchang leh Line of Control (LoC) hrula laipuia inkahna thleng chungchang te sawiho an phut.
Independent MP Kapil Sibal chu special session koh phut thu au chhuahpui hmasa ber niin April 25 khan sorkar chu ko turin a ti a. A hnuah Congress, Trinamool Congress leh AAP chuan a huhovin an phut thu an sawi ve leh.
Tun hi eptu party hrang hrangte Waqf Amendment Bill sawihova an duh loh tlan hnua an inlungrual lehna hmasa ber a ni.
Trinamool Congress MP Derek O’Brien chuan, “Keini BJP beitu party-te hi kan thawkho mek a, special Parliament session koh ngei hi kan phut tlat a ni,” tiin India Today hnenah a sawi.
Lok Sabha-a Rahul Gandhi leh Rajya Sabha-a Leader of Opposition Mallikarjun Kharge te pawhin ziakin sorkar hnenah special session koh an duh thu hi an thlen tawh bawk.
Eptu hruaitute hian tun hnaia Prime Minister Narendra Modi-a thu sawiah venhim hna thawktuten ram himna atana an beihna hrang hrangte chu politics-a thangthat lak tum nan a hmang niin an puh bawk.
“BJP-in kan sipaite inpekna hamthatna chan nana hman an tum hi chu a pawm theih loh,” tiin Kakoli Dastidar-a chuan a sawi a. Prime minister chu India leh Pakistan inthen tirha Congress chet sual palhna ramchangah hmangah a puh bawk.
AAP MP Sanjay Singh pawhin Modi-a hi beiin, “Congress-in an lo tih sual tawh a nih pawhin Prime Minister Modi-a pawh hian Indian Army-te chetna tur dangin inkahhai a puang a, kum 1971-a Bangladesh-a thil thleng kha a thlentir leh a ni,” a ti.
“Prime Minister Modi-a thisenah hian Sindoor zam lovin Operation Vote Bank chauh a kalpui a ni,” a ti bawk.