Erika Kirk-i’n a pasal Charlie Kirk kaphlumtu a ngaihdam thu a puang
Conservative activist an kahhlum Charlie Kirk, kum 31, hriatreng hun chu State Farm Stadium, Glendale, Arizona-ah an hmang a, hetah hian Carlie nupui Erika Kirk chuan thu sawiin, stadium chhunga mipui 63,000 chuang pungkhawm hmaah chuan tap chungin a pasal kaphlumtu a ngaihdam thu a puang.
Charlie hi September ni 10, 2025 khan a tih fo thin angin Utah University-ah open debate a nei leh a, hetah hian mipui hmaa a inlan laiin kahhlum a ni ta a ni. Charlie hian a t-shirt hnuaiah silai kahtlang theih loh kawr a ha tho a, mahse, silaimuin a awm bawrah a deng chu silaimu hi perin, a nghawngah a fuh ta a, a hliam tuar lovin a thi ta a ni. Charlie kaptu hi thuneitu ten man tawhin, Tyler Robinson, kum 22, a ni a, Tyler hi a pain tuneitute hnenah a hlan niin report a awm.
Charlie puala hun hmanna State Farm Stadium-ah hian US President Donald Trump leh Vice President JD Vance bakah mi pawimaw leh langsar tak takin thu an sawi a. Erika chuan a pasal kaphlumtu a ngaihdam thu puangin, “Kha pa, kha tlangval kha, ka ngaidam e. Ka ngaihdamna chhan chu Krista tihdan a ni a, Charlie tih dan tur pawh a ni,” a ti. Erika hian a ngaihdam thu a puan dawn hian Kraws chunga Isua thusawi, “Ka Pa anni hi ngaidam rawh, an thil tih an hre lo a ni,” tih a sawi chhuak bawk.
Erika hi a pasal aiawh turin Turning Point USA-ah CEO tura thlan nghal a ni a, Erika chuan a pasal thihna chu an tawpna tur a ni lo va, a hma aia nasa lehzual a ke an pen tur thu puangin, Charlie-a tih thin ang bawkin college campus event te pawh an neih chhunzawm zel tur thu a puang nghal bawk a ni.
Erika Kirk-i’n a pasal Charlie Kirk kaphlumtu a ngaihdam thu a puang
