ESI hnuaiah damdawi in leh football stadium ngen
New Delhi-a cham mek minister Lalnghinglova Hmar chuan Nilaini khan Union minister for Sports & Youth Affairs leh Labour & Employment Dr Mansukh Mandaviya a kawm a, Mizorama ESI Hospital din leh sports stadium sak a sawipui.
LESDE minister hian Employees’ State Insurance (ESI) scheme hnuaia damdawi in din chungchanga Mizoram mamawh a thlen a. ESI scheme hnuaia damdawi in khum 30 awmna sa turin mi 15000 tal inziahluh a ngai a, hei hi state te leh mihring tlem, industry lian awm lohna Mizoram tan tlin a har tih a sawi.
“Sumdawnna hmunah ESI scheme chungchang inhrilhfiah leh inziahluh runpui kalpui a ni a, tunah zirna inah kalpui leh mek a ni. Hmasawnna a awm chungin target hi tun dinhmunah phak mai a harsa rih a, ngaihhnathiam rih kan ngai,” tiin, khum 30 emaw a aia tam awmna damdawi in sak dilna a thlen.
Union minister hian ESI hnuaia damdawi in sak chu tihsak a tum tur thu a sawi.
Sports minister Lalnghinglova Hmar hian kumin July 1-a Union cabinet thukhawmin National Sports Policy (NSP) 2025 a pass avangin Dr Mansukh Mandaviya hi lawmpuina a hlan.
Indian football-ah Mizoramin dinhmun sang a luah chho mek a, Indian Super League leh I League season hnuhnung berah pawh state angin Mizoram player-ten an khel tam ber tih hrilhin, “Tuna kan thlen chin atanga hmasawn zel tur chuan infrastructure tha kan neih belh a ngai a, state dang nen khaikhina zahpuiawm lo tur football stadium kan mamawh,” a ti a. NSP thar zulzuiin PSU rintlak thawhpui tur zawnsak turin a ngen.
Union Sports minister chuan football-a Mizoram hmasawnna chu lawmawm a tih thu a sawi a. NSP thar chuan Indian sports-ah a tha zawnga danglamna a thlen ngei a beisei tih a sawi. Mizorama football stadium mai ni lo, sports infrastructure hmasawnna atan thawhpui tur PSU thlan thuai a nih tur thu leh PSU hotute nen an thutkhawm hunah Mizoram Sports minister chu a koh tel ngei tur thu a lo hrilh a ni.
ESI hnuaiah damdawi in leh football stadium ngen
