Ethiopia tlangkang khuin India lut, thlawhna zin tibuai

Ethiopia tlangkang khuin India lut, thlawhna zin tibuai
Ethiopia-a tlangkang khu nasa avangin India-a thlawhna tam tak zin tur thulhtir an ni a, airline leh tumhmunte pawh meivap nasa avangin inkaihhruaina an tichhuak hlawm a. Meivap hi khawchhak hawia kalin India hmar lam a thleng.
Hayli Gubbi tlangkang hi kum 12,000 dawn hnua a vawi khat nan Pathianni khan a inphuh chhuak a, Red Sea kaltlangin Yemen leh Oman-ah meivap chhah tak a phuh chhuak a. Arabian Sea hmar lam thlengin a inzar phah.
Khu hian Gujarat atanga India lut tanin Rajasthan, Delhi, Haryana leh Punjab lam hawiin a kal zel a. India Meteorological Department (IMD) chuan China lam pan zelin Indian van boruak hi Thawhlehni zan 07:30 velah a chhuahsan niin an sawi.
Meivap leh khu hian Delhi bakah an thenawm, Uttar Pradesh boruak pawh tibawlhhlawh zual thei a ni a. Hetih rual hian feet sang chuanga sanga awm a nih avangin mei vap hi leiah chuan a tlak a rinawm loh thung.
Air India, IndiGo, SpiceJet Akasa Air leh KLM chu tlangkang khu avanga an thlawhna zin tur thulh zingah an tel.
Newark atanga Delhi, New York atanga Delhi, Dubai atanga Hyderabad, Doha atanga Mumbai, Dubai atanga Chennai, Dammam atanga Mumbai, Doha atanga Delhi, Chennai atanga Mumbai leh Hyderabad atanga Delhi inkara thlawk turte pawh zin tur thulhtir zingah an tel.
Directorate General of Civil Aviation (DGCA) chuan airline-te chu meivap leh khu tamna lama zin lo hram tura chahin an thlawhna kawng, an inruahmanna leh tuialhthei an hmante chhut lawk hmasa turin an chah.
Airline-te hi meikhu avanga buai an awm a nih chuan rang taka sawi turin an ti a, thlawhna khawl buai emaw, cabin-a khu leh rim danglam a awm chuan sawi thuai turin an ti.
Tlangkang vapin tumhmun a tihbuai chuan operator-ten tlankawng, taxiway leh apron an endik vat a ngaih thu DGCA chuan a sawi.
Operator-te chu ngun taka thil thleng leh tlangkang khuin buaina a thlen em tih ngaihven tura tih an ni a, thlalem atanga thlalak leh khaw chin zirtute thu pawh ngaichang turin an ti bawk.
Akasa Air chuan Jeddah, Kuwait leh Abu Dhabi atanga chhuak leh lut tur an thlawhnate chu meivap tam avangin Thawhtanni leh Thawhlehniah an chawlhtir tih an sawi.
KLM Royal Dutch Airlines pawh Amsterdam-Delhi service (KL 871) leh a haw lam, Delhi-Amsterdam flight (KL 872) chu meivap leh khu vangin an thulhtir tih an sawi.
IndiGo chuan, “Ethiopia-a Hayli Gubbi tlangkang a inphuh chhuaha meivap chhah takin India khawthlang lam a tuam tan a. He thuthar hi ngaihven ngai tak a ni a, in himna kan ngai pawimawh a, in tana tha ber tur kan duh a ni,” tiin X-ah an thlawhnaa chuan tumte an hriattir.
Ethiopia-a Afar region-a tlangkang hi Pathiannia inphuh chhuak a ni a, a bula khua, Afdera chu vutin a tuam vek a. Afar TV chuan Erta Ale leh Afdera khuaah pawh a nghawr a hriat niin a puang a. A hmun hi Erta Ale tlangkang mek atanga chhimchhak km 15 vela hlaa awm a ni.