EU-in $ maktaduai tela Gaza tun din lehna scheme hawng

European Commission chuan kum hnih chuang indona avanga tlusawp, dollar tela Gaza tanpuina tur leh tun din lehna tur chu a hawng.
‘Team Gaza Initiative’ hi Thawhtanni khan Brussels-a sum thawhtute thutkhawmnaah hawn a ni a. Scheme hian hna hrang hrang – tui lakna leh inthiarna tha siam lehna, hnawm then leh damdawi in tun din lehna tur thawh a ni dawn tih EU Commission thuchhuahin a tar lang.
Sum hi Israel-in indo a kalpui mek karah Palestinian-te thata mihring dinhmun chhe tak awm karah tun din lehna atana mamawh tur chu a phak lo nasa hle tho.
Hmalaknaah hian Spain, France, Denmark, UK, Germany, Norway, Finland, Italy, Netherlands, Japan, Switzerland, Sweden leh Belgium, World Bank leh European Investment Bank te chu Commission ho hian an tel tih thuchhuahah hian tar lan a ni a. Australia leh Canada pawhin an zawm beisei a ni.
“Vawiin hian Euro maktaduai 900 vel emaw, dollar tluklehdingawn khat vel kan rawn pharh dawn a ni,” tiin EU Mediterranean commissioner Dubravka Suica-i chuan an thutkhawm tan hmain a sawi a. “Kan thil tum chu a chiang a, Palestinian-te beiseina, chhelna leh hma lam hun tha zawk siam tura puih a ni,” a ti.
Sum thawhtute hian engzat nge an thawh tih intiamna a awm lo va. Suica-i chuan thawhtute hian ‘a hma thei anga dam lehna atanga bul tan an duh a, kan tihna lantir a pawimawh hle’ tih a sawi.
“Tuna kan mamawh ni ta chu Gaza-a mite hnen kan thlen theihna tura phalna chauh a ni tawh,” a ti.
Gaza-ah hian Israel leh Hamas chuan US rawtna angin October thla atang khan ‘inkahhai’ an kalpui mek a; mahse, Israel hian a bawhchhe zing hle.
Indona tlahniam tawh mah se inkahhai tan atangin Palestinian 1,100 vel an thi tawh a, 3,500 chuangin hliam an tuar tawh bawk a. A vaiin he indonaah hian Palestinian 73,000 chuang an thi tawh a ni.
EU Equality, Preparedness & Crisis Management Commissioner chuan Gaza dinhmun chu ‘tuar theih loh’ tiin a sawi a. Hadja Lahbib chuan mihring puihna tam zawk luhtir leh Israeli thuneitute hnen atanga politic-a inrawlhna tam zawk a phut.
“Inkahhai atanga thla kuaah pawh bomb a la puak zel a, natna a darh zel a, mi an thi mek a ni,” tiin Lahbib chuan puihna tur scheme puan hma hian thuthar thehdarhtute a hrilh.
EU leh UN chuan April thla khan Gaza siam that leh atan kum 10 chhungin $ tluklehdingawn 71 chuang a mamawh dawn tih an lo sawi tawh.
Gaza Rapid Damage & Needs Assessment (RDNA) chuan thla 18 chhunga service pawimawh siam thatna tur, infrastructure pawimawh tun din lehna tur leh Gaza eibar tun dinna turin $ tluklehdingawn 26.3 a mamawh a ni dawn tih a tar lang bawk.