Euro 2024 ball a danglam dawn
Tunhnaia Uefa thu-chhuah chuan nakkum European Championship-a an ball hman tur Adidas ball technology chu a bik taka duan a nih thu tar-langin, offside leh handball chungchangah rang zawka match official-te’n thu-tlukna an siam zung zung theihna’n a pui thei dawn niin an sawi.
Germany rama Uefa European Football Cham-pionship khelh tura an ball hman tur chu a hmingah ‘Fussballliebe’ tih a ni a, chumi awmzia chu ‘love of football’ tihna niin, he ball hi Adidas company siam niin, technology sang tak nena thuam a ni a, a hun takah inkhel viltu official-te hnenah thil pawimawh (data) a pe thei dawn a ni.
Uefa Euro 2024 official match ball chhunga an khawl dah chuan ball chet dan a chhinchhiah vek dawn a, video assistant referee (VAR) tan thutlukna siam kawngah nasa taka a puih tur thu Uefa thuchhuah chuan a tarlang a, an technology hman chuan player-in ball a tawh hun a hriattir thei dawn a, a taksa khawi lai nge a fuh tih erawh a hrihl thei lo thung ang.
Official-te chuan tuna an kalpui thin dan ang tho hian khelmual chhehvela camera an kap hrang hrang atangin thlalak an lakhawm ang a, handball a awm em tih an hre zung zung thei dawn a ni.
Uefa chuan he ball thar hmang hian offside chungchangah pawh tunhma aia dik leh rang zawka thutlukna an siam theih an rin thu an puang.
“Kan khawl hman tur artificial intelligence (AI) leh player position data-in a thil man tangdun chuan Uefa-in offside manna khawl a hman mek semi-automated offside technology a chawm dawn a, chu chuan rang zawka thutlukna siam kawngah a pui ngei ang.
He thiamna (technology) hian ball tawktu ber tunge tih manchhuah zung zung kawngah VAR official-te pawh a pui hle dawn a, chu chuan handball leh penalty ham beh-bawma hun khawhrah pawh a pawttawi dawn a ni,” tiin an tarlang.
Europe khawmualpui hmun tinah VAR sawi-selna a leng mek a, a bik takin, Premier League-ah khel a hlawh zual a; manager tam takin he khaw hnathawh danah hian zawhna an ngah.
Premier League phei hi chuan offside man chhuahna khawl an tih mai ‘semi-automated offsides’ chu tun season-ah hian an hmang duh lo a, an sponsor Nike pawh-in top flight club-te lung-awipui thlap ball an la siamchhuak zo lo bawk.
Nakkum June ni 14 atanga July ni 14 chhunga khelh tur Euro 2024-a an ball hman tur Fussballliebe hi thla hmasa November ni 15 mai khan Berlin khuaa an stadium ropui Olympiastadion-ah tlangzarh niin, engti ang taka rintlak nge a nih kan la hria ang chu.
Uefa Euro 2024 hi Germany rama an khawpui 10-ah khelh a ni dawn a, chu’ng khawpuite chu – Berlin, Cologne, Dortmund, Düsseldorf, Frankfurt, Gelsenkirchen, Hamburg, Leipzig, Munich leh Stuttgart-te a ni.
Euro 2024 ball a danglam dawn
![](https://theaizawlpost.org/wp-content/uploads/Untitled-407.jpg)