December 14, Ningani zan khan Europa League 2023-24 group match khelh zawh a ni a, English Premier League club pathum; Liverpool, Brighton leh West Ham United te group champion an ni vek. Group Match hnuhnung berah erawh Liverpool an tlawm thung.
Liverpool rawlthar rual an chak lo
Group F-ah group champion ni chiang tawh Liverpool in Lotto Park-ah Beglian club lian Union St.-Gilloise an hmachhawn. Group champion ni chiang tawh an nih vang bakah Pathianni zana Manchester United hmachhawn tur an nih bawk vangin manager Jurgen Klopp chuan a player tha zawkte a chawlh hamdamtir a, an rawlthar rualte tan fiahna a pe. An rawlthar rual te hian Belgian club lakah khel chhe lem lo viau mah se an tlawm thung.
An that dan bera inlan lo Liverpool lakah Union St.-Gilloise in an khel tha a, chawlhlawk hmain goal hnih an thun hman. Minute 32-naah Mohamed Amoura chuan hmahruaina goal a thun. Goal thun hmasa zawk an nih vangin phur viau mah se goal an chhuah thuai thung. Minute 39-naah Reds tan Jarell Quansah chuan goal thunin an si phurh a sut.
Goal khat ve ve an thun hnuin inkhel a hmuhnawm zui viau a, goal dang a luh belh leh thuai. Minute 43-naah mualneitu Union St.-Gilloise tan Cameron Puertas chuan hma an hruai nawn lehna goal a thun a. He goal hi EPL hmahruaitu Liverpool lakah humhim tluan in, team lian lakah hnehna lian an sualchhual ta hial a ni.
Union St.-Gilloise lakah tlawm mah se Liverpool hian group champion ni chungin last 16 an lut a. An group atang hian khelh ruk atanga point 11 hmu Taulouse chuan last 16 playoff an khel zui ang.
Brighton in hnehna pawimawh an chang
Ninga zana inkhel dangah EPL club Brighton & Hove Albion chuan Group B hmahruaitu Marseille mikhualin, inkhel pawimawh tak an hmachhawn. Last 16 lut tlang nghal tura chak ngei ngei mamawh Brighton tan hian João Pedro chuan hun tawp dawn hnaih minute 88-naah goal pawimawh leh hlu zet a thun a, an mualah si khat faiin an chak theih phah. An mualah hnehna pawimawh tak an chan vangin Brighton hian Marseille hi point hnihin an lehpel thei ram a, group champion niin last 16 an lut. French Ligue 1 club lian Marseille hian last 16 playoff an khelh zui a ngai dawn ta thung.
An mualah West Ham an chak
Group A campion nih inchuhin West Ham United leh SC Freigburg te chu London Stadium-ah an inkhel a. Inkhel pawimawh takah Europa Conference lea-gue champion West Ham United chuan si hnih faiin hnehna an chang a, group champion niin last 16 an lut.
Europa Conference League champion West Ham hian an mualah an khel tha viau a, chawlhlawk hmain goal hnih an thun hman. Minute 14-na lekah Mohammed Kudus chuan hmahruaina goal a thun a. Minute 42-naah Edson Álvarez chuan goal thunin an hmahruaina a tizau. Chawlhlawk hnu lamah inkhel hmuhnawm viau mah se goal dang a luh belh thei tawh lo va. Hammers chuan hnehna pawimawh tak an chang zui ta a ni.
Leverkusen an chak vek
Manager Xabi Alonso hnuaia khel tha tak, German Bundesliga-ah pawh champion lai Bayern Munich chunga chuang thei hial Bayer Lever Kusen chu Europa League lamah pawh an che tha chhun-zawm viau a, ninga zana an mikhual Molde lakah 5-1 ngawta an chak leh vangin Leverkusen hi Europa League 2023-24 group match-ah chak vek awm-chhun niin hnuhma tha tak an hnutchhiah.
Group champion ni chiang viau tawh Leverkusen tan hian Patrik Schick chuan minute rukna lekah hmahruaina goal a thun a. Adam Hlozek-a’n goal hnih a thun bakah Edmond Tapsoba chuan goal khat a thun a. An goal khat dang hi Molde player Martin Ellingsen tih luh a ni ve thung.
Inkhel dangah Jose Mourinho enkawl AS Roma chuan si thum fai ngawtin an mikhual Sheriff Tiraspol sawp bawk mahse group champion an ni zo lo.
Europa League-ah EPL club an
