May 20, Nilai zan khan Europa League final khelh a ni a, Instalbul khawpuia Vodafone Park-a inkhel hmuhnawm takah Aston Villa chuan an khingpui SC Freiburg an sawp. Europa League a manager hlawhtling ber Unai Emery-a enkawl Villa hian kum 30 hnuah trophy lian an chawi ve leh ta nawlh.
Dan rual loh Villa
English Premier League-ah palina ni mek a, champions league khel tura tling chiang tawh Aston Villa hian an khingpui German Bundesliga-ah pasarihna ni mek SC Freiburg hi an ngam viau a, 3-0 ngawtin an sawp. Champion chaka tuihal Villa hian a khingpuite an ngam tluan parh a, dan rual lohin an champion.
Champion ngei tuma tan khaw Villa hian an khingpuite ngamin, nawr viau thin mah se goal an thun mai thei bik lo. Tunhnaia khel tha thei tak Morgan Rodgers chuan hlauhawm takin pet bawk mah se SC Freiburg si nghak Noah Atubolu chuan tha zetin a lo dansak a, an team a chhanhim.
Atubolu chetthat vangin him bawk mah se German club hi an him rei thei lo. Villa in fuh takin an nawr a, nal tha taka ball an inpek kual hnuin Youri Tielemans chuan mawi zetin a tawp a khar. Tielsmans hian Morgan Rogers ball chu fuh zetin a hlap lut a, minute 41-naah hmahruaina goal a thun.
Goal an thun hian Engliish club Aston Villa a fuih phur viau a, na takin an khingpuite nawr chhunzawmin goal pawh an thun belh leh thuai. Hmahruaina goal an thun atanga minute riat hnu lek; chawlhlawk dawn hnaih minute 45+3-ah Emiliano Buendía pui zetin a pet kual lut a, an goal hnihna thunin, an hmahruaina a tizau. Villa hian Youri Tielemans leh Emiliano Buendía te goal thun hmangin si hnih faia hmahruai chungin chawlhlawk an hmang.
Chawlhlawk hnu lamah Aston Villa an khel tha chhunzawm a, goal pawh an thun belh leh thuai. Khel tha tak Morgan Rogers chuan Emiliano Buendía cross tha tak chu hnaite atangin a tlawh goal a, minute 58-naah an goal thumna thunin, an hmahruaina a tizau leh zual.
Darkar khat pawh tling loah 3-0 ngawta hma an hruai tawh vangin Aston Villa dinhmun a tha tawh tak zet a, kum 30 zet an nghah tawh trophy lian chu an nghakchhuak ngei dawn tih a chiang thawkhat tawh. German club FC Freiburg hian an si phurh sut tumin tan khawh nasa viau mah hliam tuar chunga inlan Emiliano Martinez tan hna hautak an chhawp thei lova, final a khelh a pianga chak vek Martinez an paltlang hthei lo. Villa pawhin goal thun belh tum viau mah se goal dang an thun belh thei tawh bik lo. Hun tawp thlenga goal lut a awm belh theih loh vangin Aston Villa chuan 3-0 ngawtin FC Freiburg an sawp a, Europa League champion thar an ni ta a ni.
English club hlun zinga mi Aston Villa hi kum 1996 khan League Cup-ah an champion a, hemi hnu hian trophy lak an nei ta lo vang vang a. Kum 30 zet an nghah hnuah Europa League champion niin trophy an chawi. Villa hi European competion-ah an vawi hnih champion na a ni a. Kum 44 liam ta 1982 khan European Cup-ah an lo champion tawh a. Kum 44 hnuah Europe champion an ni ve leh ta nawlh.
FC Freibur hneha an champion hi Villa tantu Prince William chuan a hmunah a en a. Hnukulh teuh chungin an champion hi a lo lawm ve nghe nghe a hi.
Chawimawi tlak Emery
Manager zingah Europa League-a hnuhma nei tha ber ni a, vawi li lo champion tawh Unai Emery chuan Europ League King a nihzia a lantir nawn leh a, Europa League trophy a vawi nga lakna ni turin Aston Villa a champion.
Emery hian kum 2022 khan Steven Gerrard thlakin Aston Villa hi a enkawl tan a, hetihlai hi an talbuai lai a ni a, 17-naah awmin point thumin an him hram chauh. Manager tawnhriat ngah Emery hian chhanhimin a dinthar chho a. Europa League khel turin a tlinpui a, a champion pui ta hial a. Kum 30 zet an nghah tawh trophy a lakpui ta hial a ni.
Emery hian Europa League-ah Sevilla chu vawi thum ngawt a champion a. Villareal a champion pui bakah Aston Villa a champion pui leh bawk a, King a nihzia a nemnghet.
Europa League champion Aston Villa
