Europe-ah champ lai Real chak nghal
Champions League title kawl lai humhim tura an chetchhuah vawikhatnaah Real Madrid chuan Thawhlehni zan khan Santiago Bernabeu-ah 3-1-in an German mikhual Stuttgart an hneh a; goal khat khungtu Endrick chu Real player zinga he tournament-a goal khung thei naupang ber a ni.
Kum 18 leh ni 58 leka upa ni chungin he Brazilian rawlthar Endrick hian hun pekbelhah mualneitu team goal thumna a thun a, kum 1995 daih tawha ni kum 18 leh ni 113-a upa ni chunga Ferencvaros laka goal khungtu anclub legend Raul-a record lo siam tawh kha a khum ta a ni.
He South American striker hian kumin nipui thawt lai khan an ram club Palmeiras atangin Spanish giants hi a zawm a; La Liga lamah pawh a debut game-a Real Valladolid laka goal a khung tum khan kum zabi 21-na chhunga Madrid tana La Liga debut-a goal thun thei naupang ber a lo ni tawh bawk.
Thawhlehni zan Bernabeu inkhelah Endrick hian hun tawp hma minute 10 chauh awm tawhah damkawr Jude Bellingham a thlak a, Europe club inelna sang bera a goal hmasaber tihluh hnuah inkhel a tawp zui nghal.
Rawlthar mai ni chungin Endrick hian Brazil tan pawh match 11 khel tling tawhin, chuti zat lek khelhah ram tan goal thum a khawl tling der tawh bawk.
Defending champion Real Madrid-in Europe season thar bul an tan zan hian Kylian Mbappe pawhin Los Blancos tana a Champions League game hmasaber khelin, second half an thah fel hnu lawkah goal hmahruai a thun er nghal zawk!
France forward Mbappe goal tur hi Aurelien Tchouameni leh Rodrygo thawhrah niin, Brazilian Rodrygo hian Tchouameni ball pek chu mahnia thun mai tum loin Mbappe tan mahni hmasial lo takin a chhawpsak a, Real tana Europe club inelna lian ber a khelh hmasakber zanah Mbappe goal hmuh tur a awm zui ta a ni.
Minute 68-ah Brighton forward hlui Deniz Undav chuan Bernabeu mipui phut zawkna tur thlenin thawkrim Stuttgart siphurhna goal a tauhlut a, 1-1 a nih vang vang hnu hun pangngai tawp hma minute sarih chauh awm tawhah Antonio Rudiger chuan mualneitu team hmahruai nawnna goal tauhlut ve lehin, home team goal thumna chu tarlan tawh ang khan Brazilian rawlthar record siamna goal a ni.
Carlo Ancelotti chuan chawn tha na avanga match li chhung ngawt a chhawr theih tawh loh England midfielder Bellingham chu Thawhlehni zan Bernabeu game-ah hian a tir atangin a luhtir a, minute 80 thleng khelin, a kir zanah goal khung nghal lo mah se a intihnatbelh lo kha Real boss tana lungawina tham tling tho tura ngaih a ni!
Real hmatawng hlauhawm dang Vinicius Jr pawhin goal a khung teuh viau a, second half tir lamah box tlang hriam lai atanga a shot chuan goal kham a per nghing lawih!
Champion lai hian an match khelh leh turah Lille an luhkhung ang a, Stuttgart hian Sparta Prague an mikhual thung ang.
Europe-ah champ lai Real chak nghal
