Europe-a nipui thaw tira khaw lum uchuak tak thleng mek avangin mi za tel thihna a thlen phah thei niin World Health Organization (WHO) hotuin a sawi.
Pathianni khan Germany, Poland leh Czech Republic te pawh telin khawmualpui ram hrang hrangah a lum ber record khum leh a ni a. Khaw lum hian khawchhak lam a pan chhunzawm zel bawk.
X-ah WHO chief Tedros Adhanom Ghebreyesus-a chuan June 21 atang thi 1,300 chuang an awm tawh tih a tar lang a, ‘Europe-a khaw lum nen a inkaihhnawih’ tih a tar lang tel.
“Khaw lum uchuak hi ‘silent killer’ tia sawi a ni fo va. Europe-a chenna in, hnathawhna hmun leh sikul te hi hetiang khaw lum dawl thei tura sak a ni lo,” a ti.
Pathianni tuk khan French health ministry chuan Nilaini atang khan an ramah chhut aia mi 1,000 velin thi an tam tawh tih a sawi.
Thi tam tak hi kum 65 chung lam an ni tih agency chuan a sawi a, ina thi zat chu 40% zetin a pung tih a sawi bawk.
Tedros-a chuan, “Europe hi khawvela khawmualpui lum chak ber a ni a, khawvel pum aiin a let hnih zetin a lum zel a ni,” a ti.
Tunah hian mi maktaduai tam tak chu ‘khaw lum uchuak tak hnuaiah an khawsa mek a, za tam tak an thi a, sikul khar a ni a, power pekna pawh a buai phah’ niin a sawi.
Pathianni khan Germany-ah chuan ni thum a zawna lum ber ni record a tlin ni a ni a, an ram khawchhak lamah 41.7°C a ni.
Khawchhak lama Brandenburg, Polish ramri bula Coschen-a station pakhatah chuan tlai dar 04:00 vel khan 41.7°C hi a kai a ni.
Czech Republic chuan ni hnih a zawnin lum record an siam a, Prague hmar lam Doksany-ah 41.1°C a ni tih meteorological institute CHMI chuan a tar lang.
CHMI chuan Pathianni kha khaw lum lai ber tur tih sawi lawk tawhin khawthlang lamah phei chuan ruah leh thli a thawk zui tawh dawn niin an sawi.
Institut of Meteorology & Water Management (IMGW) thupuangtu chuan Pathianni khan AFP news agency hnenah Poland-a a lum ber tum thlengin Slubice khuaah 40.5°C a tling tih a sawi.
Khaw lum lutuk hi sik leh sa inthlak vang a ni tih Tedros chuan a sawi a, Europe chu ‘khawvel pum aiin a let hnihin’ a lum chak tih a sawi.
“Sik leh sa inthlak leh global warming vangin tunah chuan ‘chhuah khata vawi khat thleng thin’ khaw lum uchuak hi kum tin deuhthaw a thleng tawh a ni,” a ti.
Europe ramte chu ‘khaw lum laka hriselna himna tur kalpui’ turin a ngen nghal bawk.
Europe-ah khaw lum vangin mi 1,300 vel thi thei – WHO chief
