Europe chhim lamten ram kang nasa tak an tuar mek
France chhim lama Paris khawpui aia zau ram kang tawhah khua a lum thar leh avangin a inman kai thar leh thei tih an sawi.
Pathianni khan thuneitute chuan khaw lum leh thli ro chuan kang thelh mektute tan hna a tihautak lehzual thei tih an sawi.
Ram kang nasa tak hian France chhim lama Aude huam chhung tuamin an khawpui ber aia zau a kang tawh a, mi pakhat thiin mi eng emaw zat an inhliam.
“Pathianni tlai dar 04:00 atang khan khaw lum avangin red alert tihchhuah a ni a, thil a tiawlsam dawn lo,” tiin Christian Pouget, Aude prefect chuan a sawi.
Tun dinhmunah ram kang hi a darh tawh lo va, hectare 16,000-a zau huam chhungah a kang mek niin region firefighter unit chief Christophe Magny-a chuan Inrinni khan a sawi a, Pathianni zan thleng khan thunun a la ni lo.
Kang hi ‘chawlhkar tam tak chhung’ thunun tur chuan a la ngai dawn tih a sawi a. Kang thelhtu 1,300 velin a inman kai thar leh lohna atan an veng mek.
Kartawpah khan hmun thenkhatah chuan khaw lum lam chu 40°C a kai a, Thawhtanni kha ram puma a lum ber ni tur niin national weather service Meteo France chuan a sawi lawk bawk.
Nilaini khan Saint-Laurent-de-la-Cabrerisse-ah hmeichhia kum 65 mi chu a chenna inah thia chhar niin a in hi a kang.
Thuneitute chuan a cheng dang pakhat na taka kang hliamin mi dang paliin hliam tenau an tuar niin an sawi a. Kang thelhtu 19 an inhliam tawh bawk.
Tun tuma ram kang mek hi kum 50 vel chhunga an tawrh nasat ber niin disaster thuneituten an sawi.
Prime Minister Francois Bayrou-a chuan kar hmasa khan chhiatna thlenna hmunte tlawhin ram kang chu ‘rinphak baka chhiatna’ tiin a sawi.
Europe hmun dangah Pathianni khan Italian kang thelhtute chuan Naples bul, Mount Vesuvius-a tlangkanna hmun kea panna kawng bul lawkah ram kang an thelh mek.
National fire service chuan lei lamah team 12 leh Canadair thlawhna paruk hmangin an thelh a, Italy chhim lama national park hi Zirtawpni atang khan a kang a ni.
Greece-ah emergency services chuan ni hnih liam ta chhungin hmun eng emaw zata kang an thunun thei a; mahse, khua a khen avang leh thli na tak a tleh reng avangin a kang thar leh thei reng niin Pathianni khan civil protection thuneituten an sawi.
Athens chhimchhak lam region chu a tuar na ber niin lo, ramngaw leh hnim tona hectare 1,600 dawn a kang chhe tawh niin meteorological service chuan a sawi.
Himna atan khaw tam tak rauhsan a ni a, mi 400 chuang chhanchhuah an ni a, Zirtawpni khan hmun kilkhawr takah mipa pakhat a thi.
Europe chhim lamten ram kang nasa tak an tuar mek
