2025-26 season chu a her liam ta a, season liam taah Europe a chetha zual 15 te goal.com in a tarlante kan hruat kual ang.
15. Pedri (Barcelona)
Spanish La Liga-ah Barcelona an champion nawn theih nana thawhhlawk leh an muallai luahlumtu langsar tak chu Pedri hi a ni. Season liam ta khan La Liga-ah game tima ball pass vawi 80.4 zel nei ang a ni a. Amah aia ball pekchhuah ngah chu Barca tana a khelhpui Pau Cubarsi chauh a ni. Pedri hian La Liga season liam taah khan assist vawi 12 a nei.
Barcelona an champion theih nana thawhhlawk tak Pedri hi World Cup-ah Spain aiawh tura koh a ni a. Champion tura rinkai Spain player pawimawh ni phak tura ngaih a ni.
14. Lautaro Martinez (Inter)
Inter Milan champion hian season liam ta khan Italian Serie A-ah goal 17 thunin top-scorer a ni a, season thum chhung a vawi hnih nan Inter Milan a champion pui. Champions League-ah vawi riat khelin goal li a thun bawk. Serie A leh Coppa Italia-ah an champion theih nan a thawhhlawk hle.
Martinez hi goal thun thei a nih piahah team tana thawhhlawk, player tangkai tak a ni.
13. Gabriel Magalhaes (Arsenal)
English Premier League-a Arsenal an champion theih nan leh Champions League final an thlen theih nana thawhhlawk tak chu defender Gabriel Mangalheas hi a ni.
Gabriel leh William Saliba te inkawp hi an rinawm hle a, paltlang an har hle. EPL leh Champions League-ah clean sheet nei ngah ber an ni a, goal an chhuah tam lo hle. Tlarhnung a player tangkai tak a nih bakah Gabriel hi ball kangah a hlauhawm tel em em a, Arsenal tan goal pawimawh a thun leh nawlh thin. Defender ni chungin season liam ta khan goal li lai a thun.
Gabriel hian champions League final-ah penalty a thelh a, Arsenal an chak loh phah thung. Penalty a thelh vangin endawng a hlawh phah chuang lo thung a, penalty a thelh hnuin a jersey hralh a kal thut a, 350% zetin a jersey hralh a tam thut zawk tlat.
12. David Raya (Arsenal)
English Premier League-ah a zawna tum thum ngawt Golden Glove dawng thei David Raya hi tunlaia si nghak tha ber zinga mi a ni. Raya hi season liam khan inelna hrang hrangah vawi 50 a inlan a, goal 30 chauh a chhuah. Inelna hrang hrangah clean sheet vawi 28 zet a nei a. EPL leh UCL-ah clean sheet ngah ber a ni.
EPL-ah Arsenal an champion theih nan leh Champions League final an luh theih nana thawhhlawk tak Raya hi Spain manager Luis de la Fuente chuan Spain-ah Raya an hriat ve loh thu a sawi mauh thung. Heti a nih vang hian Raya hi World Cup-ah Spain tan a inlan phak kher lo mai thei.
11. Erling Haaland (Manchester City)
Tunlaia striker Erling Haaland hi season liam ta pawh khan a che chhe lo leh pek hle. English Premier League-ah goal 27 thunin Golden Boot a dawng a. EPL-ah hian season thum chauh la khel mah se Golden Boot vawi hnih a dawng der tawh. Season liam ta khan Haaland hian inelna hrang hrangah goal 38 a thun a, assist vawi kua a nei bawk. Manchester City chu League Cup leh FA Cup-ah a champion pui.
10. Vitinha (Paris Saint-Germain)
Vitinha hi tunlai midfielder tha ber ang hiala ngaih a ni a, French Ligue 1 leh champions League-ah PSG an champion theih nan a thawhhlawk hle. Season liam ta khan inelna hrang hrangah gial 7 a thun a, assist vawi 10 a nei tling bawk. UCL ah bik phei chuan Game tinah ball pass dik vawi 90 (90.6) nei ziah ang a ni.
9. Bruno Fernandes (Manchester United)
Champion na nei lo chunga EPL player tha bera thlan ni hial thei leh Football Writters Association ten player tha bera an thlan Bruno Fernandes hi mimal takin a chetha hle. EPL-ah assist vawi 21 neiin season khata assist ngah ber record a siam hial.
United hi season liam ta khan an chetha lo viau a, Reuben Amorim hnuaiah phei chuan an tlahniam duai duai. Michael Carrick hnuaiah hma an sawn zawt zawt thung a, EPL-ah pathumna an ni phak ta hial. EPL-ah pathumna an nih theih nana thawhhlawk tak chu Bruno Fernandes hi a ni.
8. Khvicha Kvaratskhelia (PSG)
Kvaratskhelia hi tunlai winger tha bera ngaih a ni a, Champions League leh French Ligue 1-ah PSG an champion theih nan a thawhhlawk hle. Champions League final-ah penalty a hlawhchhuah hlauh vangin Arsenal laka an si phurh an sut thei hram a. Penalty Shootout ah an vannei zui ta nghe nghe.
7. Luis Diaz (Bayern Munich)
Bayern Munich tan Luis Diaz hi a chetha in a vul ngang mai si a, chhuahtirtu Liverpool tan inchhir vawng vawng natham a ni. Diaz hian Bayern Munich tan inelna hrang hrangah goal 26 lai a thun a, assist vawi 19 zet a nei tling bawk. Bayern Munich hi Bundesliga leh DFB-Pokal ah a champon pui. A tlan chak a, ball a thiam bawk si a, defender te mangchhia thlen thintu a ni.
6. Ousmane Dembele (PSG)
Ballon d’Or kawl mektu a ni a, mimal chawimawina sang dawng tlak a nihzia lantirin a Dembele hian a khel tha chhunzawm. Hliamin a tibuai a, Ligue 1 ah vawi 10 chauh bul a tan chungin Ligue 1 Player of the Year ah thlan a ni tho. Champions League final-ah Arsenal laka an si phurh sutna goal thuntu Dembele hian season liam ta khan inelna hrang hrangah goal 19 a thun a, assist vawi 11 a nei tling bawk.
5. Declan Rice (Arsenal)
Ball thiam, huaisen, paukhauh leh taima, hruaitu nih tling bawk Rice hi EPL-a Arsenal an champion theih nana player thawhhlawk a ni a. Player zahkai tak a ni tel bawk. Champion tuma an elpui lian Manchester City laka an tlawm tumin a player puite an ngui a, an beidawn em em laiin Rice hi chuan, “Inelna a la tawp lo, hei hi a tawpna tur a la ni lo” tiin a fuih lawm lawm a. Huaisenna nei tharin kum 22 hnuah a champion zui ta hial bawk. Rice hian EPL-ah vawi 36 khelin goal li a thun a, assist vawi nga a nei bawk a, ball pass dik 91% zet a nei bawk.
4. Kylian Mbappe (Real Madrid)
Trophy chawi nei lovin Real Madrid in season an khar. Trophy lak nei lo mah se mimal takin Kylian Mbappe erawh a chetha viau thung. Mbappe hian goal thun thei a nihzia a lantir nawn leh. La Liga-ah goal 25 thunin top scorer a ni a. Champion League-ah vawi 11 khelin goal 15 a thun a, top scorer a ni bawk. World Cup ah Golden Boot a lo dawng tawh bawk a, Mbappe hian Golden Boot a dawng mawlh mawlh a ni ber mai.
3. Lamine Yamal (Barcelona)
Kum 19 a la tling lova, football-ah erawh thil ropui tiin player langsar tak a ni tawh thung, Lamine Yamal hi. Yamal hian season liam ta khan goal 24 a thun a, assist vawi 17 lai a nei bawk. Barcelona chu La Liga-ah Super Cup-ah a chamion pui. Football thiam bik tura duan, Lionel Messi malsawmna dawng a ni a, Yamal hi a pui chho deuh deuhin a rinawm.
2. Michael Olise (Bayern Munich)
Bayern Munich tan a chet that theih em vangin Michael Olise hian club lian hrang hrang ngaihven a hlawh chho hle. Bayern Munich hian kum 2024 khan Crystal Palace atangin an la a, an la fuh hle. Season liam ta khan Bayern tan goal 22 a thun a, assist vawi 26 zet a nei tling bawk. Bayern Munich in an ngainat em em chu Arjen Robben kha a ni a. Olise hi Robeben thar tiin an kova, a phu viau bawk.
1. Harry Kane (Bayern Munich)
2025-26 season kha chu Harry Kane tan chuan, “Hei zet chuh,” tih ngei ngai a ni.
Kane hian season liam ta khan Bayern Munich tan inelna hrang hrangah goal 61 zet a thun. Bundesliga-ah Golden Boot a dawng a, European Golden Shoe a dawng tel bawk. World Cup-ah England an chetha a, an champion a nih ngat chuan Kane hian Ballon d’Or a dawng ngei tura ngaih a ni.
Europea a player chetha zual 15 te
