European-ten min puihna tur kan pawm – Zelenskiy
February 24-a Russia-in a rûn champha kum lina a thlen hma lawkin Ukraine chuan a European thawhpuiten energy leh sipai thila an puihna tur chu an pawm tih President Volodymyr Zelenskiy-a’n a sawi.
US-in inremna a awm theih nana hma a lak mekna karah Kyiv hian indona muala Russian-ten hma an sawn chak em em lai leh boruak atanga an energy hmunpui leh an sem darhna an tihchhiahsak nasat avangin a thawhpui ramte chu pui turin a nawr nasa hle.
“Munich-ah Berlin Format hruaituten Ukraine tana energy leh sipai thila ruahmanna an siam chu pawm a ni a, February 24-ah a lo thleng dawn a ni,” tiin Zelenskiy-a hian Pathianni khan X-ah a tar lang.
Zelenskiy-a hian Zirtawpni khan Berlin Format tia an sawi pawl hruaitute chu a kawm a, heng mite hi European hruaitute niin Munich-a an inbiaknaah hian air-defence missile telin thlawpna tam zawk hmuh a beisei a ni.
“Kan thawhpuiten min puih an inpeih hi a lawmawm em em a, a lo thlen hun pawh kan nghakhlel hle a ni,” a ti.
Russian-ten Kyiv leh khawpui lian hmun danga energy hmunhma a beih nasat avangin Ukraine-a cheng maktaduai tel chuan thlasik khaw vawt vin tak an tawrh mek laiin power an indaih lo va, intihlumna hmanrua pawh an neih theih loh phah.
Zelenskiy-a chuan Russia hian chawlhkar khat liam ta chhungin drone 1,300 vel, guided aerial bomb leh ballistic missile 1,200 velin Ukraine an kap niin a sawi bawk.
European-ten min puihna tur kan pawm – Zelenskiy
