Tesla te profit chu nikuma an hmuh aiin a chanve lawihin a tlahniam a, hei vang hian model thar tlangzarh an tum thu sawiin an tlakhniam avang hian an hnathawk sang tel an ban bawk.
Eletric vehicle (EV) siamtute chuan nikum kumtir atanga thla thum chhungin $2.52 billion an lakluh thu sawiin kumin chuan $1.13 billion chauh an la lut tiin an sawi.
Tesla hi billionaire Elon Musk ta leh enkawl mek niin an hmunpui Texas leh California ah an hnathawk 6,000 chuang an ban tur thu a sawi bawk.
Tesla te hian an car siamchhuah demand tlahniam mai bakah Chinese EV car siam man tlawm zawk si avangin an hloh mek a, an stock price pawh kum 2024 chhungin 43% velin a tlahniam tawh a. Thla kalta khan khawvel pumah an hnathawk 10% in an tihhniam tur thu an lo sawi tawh bawk.
Tesla te chuan customer thar neih belh leh an neihsa te sawhngheh tumin hma an la thung a. Harstana an tawh chu thil danglam a ni lo an ti bawk a. “Khawvel pumah EV hralh a tlahniam a, car siamtu ten EV aiah hybrids an ngaih pawimawh zawk vang a ni” tiin Tesla te chuan an tarlang.
Chinese siam EV te chu a lar bawk a, Tesla te car aia tlawm daih niin a rintlak bawk tho si avangin Chinese siam car lei an pung nasa bawk.
Tesla te chuan California ah an hnathawk 3,332 an bantur thu sawiin Texas bikah pawh 2,688 an ban a ngaih thu an saiw bawk a.
Texas a hnathawk ban te hi California a Tesla a hnathawk awm zawng zawng 23,000 vel atanga 12% lawih an ni pha a ni.
Khawvel huapin Tesla te hian hnathawk 140,000 an nei mek thung niin US regulator te chuan an sawi bawk.
Heng bakah hian Tesla tena harsatna an tawh mek chu Musk compensation a ni. Tesla shareholder te chu Musk compensation package $56 billion hu vel remtihna pe turin an ti a, mahse chu chu Delaware judge-in a hnawl sak thung.
Judge chuan Tesla director te chuan Musk chu duhsak uchuak tiin a sawi a. Delaware judge-in remtihna a pek duh loh avang hian Musk chuan an firm chu Delaware atanga Texas a insawn turin a ti thung.
Tun dinhmunah erawh Tesla stock value a tlakhniam avangin Musk compensation package chu $10 billion vel chauh ni tawh tura ngaih a ni a, chu pawh chu ram tam tak te GDP aiin a la tam fe zawk.
EV company lian ber Tesla profit tlahniam
