Everest Man-in a vawi 31 nan lawn chhuak leh ta
Nepali sherpa, ‘Everest Man’ tia an sawi, Kami Rita chuan a vawi 31 nan Mount Everest a lawn chhuak a, ama record siam sa belhchhahin khawvela tlang sang ber lawn chhuak zing ber a ni.
Kum 55 mi hian Indian army hotu liante hruaiin Thawhlehni zing dar 4:00 khan metre 8,894-a sang hi a thleng leh a ni.
“Kami Rita Sherpa hi inhmelhriattir ngai tawh chuang lo a ni a. Kan rama tlang lawna kan pasaltha a ni mai lo va, khawvel puma Everest chhinchhiahna a tling a ni,” tiin expedition organiser Seven Summit Treks chuan thuchhuahah a tar lang.
Kami Rita hian kum 1994 khan Everest hi a vawi khat nan a lawn chhuak a, hemi tum hian sumdawnna atana tlang lawnte a hruai a, hemi hnu hian kum tin a lawn ta ziah a ni.
Kum 2023 leh 2024-ah kha chuan vawi hnih a lawn nghe nghe.
Everest lawn chhuah zin lamah Nepali sherpa Pasang Dawa chu amah hnaih bertu niin vawi 29 a lawn tawh a, kar hmasa khan a lawn belh leh a ni.
Kami Rita-a hian a hmain tlang lawn chu a hna mai a nih thu a sawi a. “Record siam chu a nuam a; mahse, record-te chu khum zel a ni,” tiin nikum May thla khan AFP a hrilh a. “Tlang ka lawn hian khawvelin Nepal an lo hriat phah hi lawmawm ka ti,” a ti.
Kami Rita-a hma chiah kar khat liam taah khan British mountaineer Kenton Cool-a chuan a vawi 19 nan Everest chhip a thleng a, ani hi sherpa ni lo zinga lawn chhuak zing ber a ni a, ani pawhin ama record siam sa a siam belh leh a ni.
Kuminah hian Everest lawn hun laiin mi 500 chuang leh anmahni hruaitu eng emaw zatin an lawn chhuak a, tunah hian lawn hun hi a tawp tan mek.
Nepal chuan kuminah hian tlang lawn phalna 1,000 chuang a pe chhuak a, hengte hi Everest leh tlang dangte a ni.
Tun hnaiah Everest chhip thlen tum hi an pung nasa a, mi tam lutuk hi khuarelin a tawrh phah hlauhna a awm.
Nikum khan thuneitute chuan tlang lawnte chu an ek leh hnawm dangte tifaia tihriral tura base camp-a hawn turin an ti a ni.
Everest Man-in a vawi 31 nan lawn chhuak leh ta
