High School Leaving Certifcate (HSLC) leh Higher Secondary School Leaving Certifcate Examination (HSSLC) Exam neih tan a nih avangin khaih lak loa power supply pekchhuah kawngah Power & Electricity department hotuten theihtawp chhuah turin an ngen tih Mizo Zirlai Pawl chuan an sawi.
MZP Gen. Hqrs hruaitute chuan HSLC leh HSSLC exam neih chhunga power supply mumal tak a awm theih nan Thawhtanni khan Power & Electricity minister F Rodingliana chu a chenna inah a hmu a. Zirlaiten an zirlai tha taka an zir theih nan theihtawpa hma la turin an ngen. Minister hian hma a lak nghal tur thu MZP hruaitute hrilhin, khua a lum chhoh zel avangin power supply-a indaih lohna pawh a ziaawm chhoh a beisei tih a sawi a ni.
MZP Gen. Hqrs. thuchhuak chuan, zirlaite tana hun pawimawh HSLC exam February 26-a tan a ni ta a, HSSLC exam pawh February 28-a tan tum a ni, tiin, zirlaiten an zirlai tha taka an zir theih nan leh tha taka an pass theih nan duhsakna a hlan tih a sawi a. Zirlaite zirna tibuai thei zawnga ri bengchheng leh zirlaite rilru tibuai thei programme huaihawt lo turin Mizo mipui a ngen tih a sawi bawk.
Exam neih laia power lama tan la turin ngen
